भाविकांनो..ss श्री सप्तशृंग गडावर जाणारा घाट रस्ता आजपासून ९ जानेवारीपर्यंत ‘या’ वेळेत राहणार बंद !

कळवण : श्री सप्तशृंग गडावर जाणाऱ्या घाट रस्त्यावरील दरड प्रतिबंधक काम पुन्हा हाती घेण्यात आले असून, आजपासून (दि. २५) ९ जानेवारीपर्यंत टप्प्याटप्प्याने रस्त्यावरील वाहतूक बंद ठेवण्यात येणार आहे. सकाळच्या वेळात हा रस्ता बंद ठेऊन दुपारनंतर तो भाविकांना गडावर जाण्यासाठी खुला ठेवण्यात येणार आहे. गडावर जाणाऱ्या घाटरस्त्यावरील दरड प्रतिबंधक काम नवरात्र उत्सवाच्या काळात स्थगित करण्यात आले होते, ते पुन्हा सुरू करण्यात येणार आहे. रस्त्याला अडथळा ठरणारे सैल खडक व झुडपे काढण्यासाठी नांदूरी ते सप्तशृंगगड घाट रस्ता २५ नोव्हेंबरपासून ९ जानेवारीपर्यंत प्रत्येक सोमवार, बुधवार व गुरुवार या तीन दिवशी बंद तर मंगळवार, शुक्रवार, रविवार या तीन दिवशी सुरू ठेवण्यात येणार असल्याचे सहायक जिल्हाधिकाऱ्यांनी सांगितले.

सकाळी ६ ते ११.३० या कालावधीत नांदुरी ते गडरस्ता वाहतुकीसाठी बंद राहील व त्यानंतर खुला करण्यात येईल. सप्तशृंगगडावर वर्षातून चैत्र व नवरात्र अशा दोन उत्सवानिमित्त यात्रा भरते. त्यासाठी लाखोंच्या संख्येने भाविक, पर्यटकांची गडावर देवीच्या दर्शनासाठी गर्दी होते.

गडावर विशेषतः पावसाळ्यात घाटात छोट्या मोठ्या दरड कोसळून वाहतुकीला अडथळा निर्माण होतो. त्यामुळे भाविकांच्या व स्थानिक नागरिकांच्या मागणी व पाठपुराव्यामुळे सार्वजनिक बांधकाम प्रशासनाने हे काम युद्धपातळीवर हाती घेतले आहे.