पंतप्रधान मोदींची जॉर्जिया मेलोनी यांना ‘मेलोडी’ चॉकलेटची गोड भेट; सोशल मीडियावर व्हिडिओ व्हायरल!
विशेष प्रतिनिधी / नवी दिल्ली : जागतिक राजकारणातील दोन दिग्गज नेते, भारताचे पंतप्रधान नरेंद्र मोदी आणि इटलीच्या पंतप्रधान जॉर्जिया मेलोनी यांच्यातील मैत्रीपूर्ण संबंध नेहमीच जगभरात चर्चेचा विषय ठरतात. सोशल मीडियावर या दोन्ही नेत्यांच्या नावावरून ‘#Melodi’ हा हॅशटॅग आणि अनेक मीम्स प्रचंड लोकप्रिय आहेत. अशातच आता या ‘मेलोडी’ ट्रेंडला आणखी एक गोड वळण मिळाले असून, पंतप्रधान नरेंद्र मोदी यांनी इटलीच्या पंतप्रधान जॉर्जिया मेलोनी यांना प्रत्यक्षात ‘मेलोडी’ चॉकलेट भेट म्हणून दिले आहे. या मजेशीर क्षणाचा व्हिडिओ स्वतः मेलोनी यांनी सोशल मीडियावर शेअर केला असून, तो सध्या इंटरनेटवर प्रचंड व्हायरल होत आहे.
मेलोनी यांच्या चेहऱ्यावर उमलले हसू
पंतप्रधान मोदींनी दिलेल्या या अनपेक्षित आणि खास ‘मेलोडी’ चॉकलेटची टॉफी स्वीकारताना जॉर्जिया मेलोनी यांच्या चेहऱ्यावरील आनंद पाहण्यासारखा होता. एका जागतिक नेत्याकडून मिळालेली ही हलकी-फुलकी भेट स्वीकारताना त्यांनी अत्यंत आनंदी प्रतिक्रिया दिली.
इन्स्टाग्रामवर मानले आभार
पंतप्रधान मेलोनी यांनी स्वतः या मजेशीर आणि सुंदर क्षणाचा व्हिडिओ आपल्या अधिकृत इन्स्टाग्राम अकाउंटवर शेअर केला आहे. हा व्हिडिओ पोस्ट करताना त्यांनी “Thank you for the gift” (भेटीसाठी धन्यवाद) असे लिहीत पंतप्रधान मोदींचे आभार मानले आहेत.
सोशल मीडियावर मीम्सचा पाऊस
हा व्हिडिओ समोर आल्यानंतर सोशल मीडिया युजर्सनी त्यावर वेगवेगळ्या मजेशीर प्रतिक्रिया देण्यास सुरुवात केली आहे. भारतामधील अत्यंत लोकप्रिय जाहिरात “मेलोडी इतनी चॉकोलेटी क्यूं है?” (मेलोडी इतकी चॉकोलेटी का आहे?) या संवादाचा वापर करून नेटिझन्स मोठ्या प्रमाणावर मीम्स आणि पोस्ट शेअर करत आहेत. दोन्ही देशांमधील राजनैतिक संबंधां पलीकडे जाऊन पाहायला मिळालेला हा थेट आणि मैत्रीपूर्ण संवाद सध्या जागतिक स्तरावर कौतुकाचा विषय ठरत आहे.
