माजी खासदार बृजभूषण शरण सिंह यांची महिला कुस्तीपटूंच्या लैंगिक छळ प्रकरणातून निर्दोष मुक्तता; दिल्ली न्यायालयाचा मोठा निर्णय

नवी दिल्ली : दिल्लीतील राऊस ॲव्हेन्यू न्यायालयाने सोमवारी महिला कुस्तीपटूंच्या गाजलेल्या लैंगिक छळ प्रकरणात भाजपचे माजी खासदार आणि भारतीय कुस्ती महासंघाचे (WFI) माजी अध्यक्ष बृजभूषण शरण सिंह यांची निर्दोष मुक्तता केली आहे. या खटल्यात न्यायालयाने बृजभूषण शरण सिंह यांच्यासह सहआरोपी तथा WFI चे माजी सहसचिव विनोद तोमर यांनाही सर्व आरोपांमधून मुक्त केले आहे. निकाल देताना न्यायालयात प्रसारमाध्यमांना प्रवेश देण्यात आला नव्हता, मात्र निकालानंतर बृजभूषण यांच्या वकिलांनी ही “सन्मानपूर्वक निर्दोष मुक्तता” असल्याचे स्पष्ट केले.

या संपूर्ण प्रकरणाची सुरुवात २०२३ मध्ये झाली होती, जेव्हा देशातील आघाडीच्या महिला कुस्तीपटूंनी दिल्लीतील जंतर-मंतर येथे ऐतिहासिक आंदोलन उभारले होते. WFI चे अध्यक्ष असताना बृजभूषण शरण सिंह यांनी आपला लैंगिक छळ केल्याचा गंभीर आरोप महिला कुस्तीपटूंनी केला होता. या आंदोलनाला देशभरातून मोठा पाठिंबा मिळाला होता. विविध राजकीय पक्ष, सामाजिक संघटना आणि मान्यवरांनी कुस्तीपटूंच्या मागण्यांचे समर्थन केले होते.

या प्रकरणी दिल्ली पोलिसांनी कसून तपास करत १५ जून २०२३ रोजी न्यायालयात सुमारे १,५०० पानांचे आरोपपत्र दाखल केले होते. त्यांच्याविरोधात भारतीय दंड संहितेच्या (IPC) कलम ३५४ (विनयभंग), ३५४A (लैंगिक छळ), ३५४D (पाठलाग) आणि ५०६ (गुन्हेगारी धमकी) यांसारख्या गंभीर कलमांखाली गुन्हे दाखल करण्यात आले होते. त्यानंतर मे २०२४ मध्ये न्यायालयाने त्यांच्याविरोधात आरोप निश्चित करण्याचे आदेश दिले होते, ज्यामध्ये काही मुद्यांवरून त्यांची आधीच मुक्तताही झाली होती.

या वादग्रस्त प्रकरणामुळे २०२३ मध्ये देशाच्या क्रीडा आणि राजकीय वर्तुळात मोठे वादळ निर्माण झाले होते. विरोधी पक्षांकडून तीव्र टीका होत असताना आणि राजकीय परिणामांची शक्यता लक्षात घेऊन भाजपने २०२४ च्या लोकसभा निवडणुकीत उत्तर प्रदेशातील कैसरगंज मतदारसंघातून बृजभूषण शरण सिंह यांना उमेदवारी दिली नव्हती. त्याऐवजी पक्षाने त्यांच्या सुपुत्राला, म्हणजेच करण भूषण सिंह यांना रिंगणात उतरवले होते, ज्यांनी त्या मतदारसंघातून विजय मिळवला.

बृजभूषण सिंह यांची प्रतिक्रिया

न्यायालयाच्या निकालानंतर माध्यमांशी बोलताना बृजभूषण शरण सिंह यांनी आपली भूमिका स्पष्ट करताना म्हटले, “पहिल्याच दिवशी मी सांगितले होते की, माझ्यावरील एकही आरोप सिद्ध झाला तर मी स्वतःला फाशी देईन. न्यायालयाने मला आणि विनोद तोमर यांना सन्मानपूर्वक निर्दोष मुक्त केले आहे. मी न्यायालय आणि माझ्या वकिलांचा मनापासून आभारी आहे.” तसेच, न्यायालयाचा सविस्तर आदेश पूर्णपणे वाचल्यानंतरच आपण यावर अधिक भाष्य करू, असेही त्यांनी स्पष्ट केले.

अंतिम सुनावणी आणि युक्तिवाद:

अंतिम सुनावणीदरम्यान दिल्ली पोलिसांनी न्यायालयात बृजभूषण शरण सिंह यांच्याविरोधातील आरोप अत्यंत गंभीर असल्याचे सांगत, तक्रारदार महिला कुस्तीपटूंचे जबाब आणि इतर पुराव्यांच्या आधारे दोषसिद्धी व्हावी, अशी जोरदार भूमिका मांडली होती. मात्र, दोन्ही बाजूंचे सविस्तर युक्तिवाद, पुरावे आणि कागदपत्रे तपासल्यानंतर न्यायालयाने दोन्ही आरोपींना पुराव्यांच्या अभावी निर्दोष ठरवले आहे.