गौरी पालवे–गर्जे आत्महत्या प्रकरणात पंकजा मुंडे यांचे स्वीय सहायक अनंत गर्जे यांना अटक

मुंबई : गौरी पालवे- गर्जे आत्महत्या प्रकरणात पंकजा मुंडे यांचे स्वीय सहायक (पीए) अनंत गर्जे यांना अटक करण्यात आली आहे. गेल्या काही तासांपासून अनंत गर्जे हे फरार होते. अखेर वरळी पोलिसांसमोर रविवारी रात्री १ वाजता अनंत गर्जे यांनी आत्मसमर्पण केले. त्यानंतर पोलिसांनी अनंत गर्जे यांना अटक केली. अनंत गर्जे यांना सोमवारी न्यायालयात हजर करण्यात आले. न्यायालयात अनंत गर्जे यांची पोलीस कोठडी मिळवण्यासाठी प्रयत्न केला जाणार.

वरळी पोलिसांनी गौरी पालवे गर्जे आत्महत्येप्रकरणी अनंत गर्जे, त्यांची बहीण शीतल गर्जे- आंधळे आणि दीर अजय गर्जे यांच्या विरोधात गुन्हा दाखल करण्यात आला आहे. या तिघांवर त्रास देणे, अपमान करणे आणि आत्महत्येस प्रवृत्त केल्याचा ठपका ठेवण्यात आला आहे.वरळी पोलिसांनी रविवारी गुन्हा दाखल केला होता.

गौरी पालवे यांच्या आत्महत्या प्रकरणाबाबत अनंत गर्जे यांच्याकडून एक निवेदन जारी करण्यात आले आहे. या निवेदनात म्हटले आहे की, पत्नीच्या दुर्दैवी आणि मन हेलावून टाकणा-या घटनेनंतर अनंत गर्जे यांनी दिनांक २४ रोजी मध्यरात्री वरळी पोलिस स्थानकात हजर झाले. कायद्याची संपूर्ण प्रक्रिया पारदर्शक आणि न्याय्य रितीने पार पडावी, यासाठी अनंत गर्जे स्वखुशीने पोलिसांना सहकार्य करण्याचा निर्णय घेतला आहे. तपासाला सहकार्य करण्यासाठी त्यांनी स्वत:हून पोलिसांसमोर हजर होण्याचा निर्णय घेतला.

गौरीला मारहाण करायचा अनंत?

दोन महिन्यांपासून गौरी आणि तिच्या नवऱ्याचा वाद सुरु होता, अशी माहिती गौरीच्या कुटूंबियांनी दिली आहे. मागील महिन्यात 3 ऑक्टोबर रोजी अनंतच्या वाढदिवसानिमित्ताने आई-वडिलांनी काहीही न कळवता जेव्हा तिचं घर गाठलं. तेव्हा, गौरी हिच्या चेहऱ्यावर आणि गळ्यावर मारल्याचे व्रण दिसले. आई-वडिलांना पाहून ती घाबरली. तुम्ही जा, असं ती सांगत होती, त्यावेळी आई-वडिलांना संशय आल्यानंतर त्यांनी लेकीकडे विचारपूस केली होती.

अहिल्यानगर येथील मोहोज देवढे या मूळगावी अंत्यसंस्कार

दरम्यान, सोमवारी (दि.२४) गौरी पालवे-गर्जे यांच्या पार्थिवावर अहिल्यानगर येथील मोहोज देवढे या मूळगावी अंत्यसंस्कार करण्यात आले. यावेळी पालवे यांच्या नातेवाईकांनी अनंत गर्जे यांच्या घरासमोरच आपल्या मुलीवर अग्निसंस्कार व्हावेत, असा आग्रह धरला होता. यावरुन गर्जे आणि पालवे यांच्या नातेवाईकांमध्ये बाचाबाची झाल्याचे पाहायला मिळाले. पोलिसांनी मध्यस्थी करत हा वाद मिटवला. यानंतर अनंत गर्जे यांच्या घराशेजारीच डॉ. गौरी पालवे यांच्या पार्थिवाला अग्नी देण्यात आला. या परिसरात कडेकोट पोलीस बंदोबस्त असून सध्या येथील परिस्थिती नियंत्रणात आहे.

अखेरचा निरोप देताना वडिलांचा आक्रोश

“तुम्हाला मुली असतील तर त्या गरिबाला द्या. श्रीमंतांच्या नादी लागू नका, त्यांच्या भपक्यावर जाऊ नका,” असं म्हणत गौरी पालवे यांच्या अंत्यसंस्कारावेळी त्यांच्या वडिलांनी आपल्या भावना मांडल्या. तसंच यावेळी पोलिसांसमोरही त्यांनी न्यायासाठी हंबरडा फोडला. तुम्हाला मुली असतील तर माझ्या मुलीला न्याय द्या, असं ते म्हणाले.