NEET Scam: पुण्यात मोठी कारवाई! पेपर विकणाऱ्या टोळीचा पर्दाफाश; रॅकेटमध्ये महिलेचा समावेश
पुणे : देशभरात खळबळ माजवणाऱ्या ‘नीट’ (NEET) परीक्षा पेपरफुटी प्रकरणात आता पुण्यातून मोठी बातमी समोर येत आहे. पेपरफुटीच्या रॅकेटमध्ये सहभागी असल्याच्या संशयावरून पुणे पोलिसांनी एका महिलेला आणि एका विद्यार्थ्याला अटक केली आहे. या कारवाईमुळे शिक्षण क्षेत्रात आणि पालकांमध्ये मोठी खळबळ उडाली असून, या रॅकेटचे जाळे किती खोलवर पसरले आहे, याचा तपास आता वेगाने सुरू झाला आहे.
मिळालेल्या माहितीनुसार, अटक करण्यात आलेली महिला आणि विद्यार्थी हे पेपरफुटीच्या साखळीतील महत्त्वाचे दुवे असल्याचे मानले जात आहे. नीटच्या पेपरची मागणी करणाऱ्या गरजू विद्यार्थ्यांचा शोध घेणे, त्यांच्याकडून मोठी रक्कम उकळणे आणि त्यानंतर त्यांना मुख्य दलालापर्यंत पोहोचवणे, अशी कामे हे दोघे करत असल्याचा संशय आहे.
पोलिसांनी दिलेल्या प्राथमिक माहितीनुसार, ही महिला एजंट म्हणून काम करत होती आणि विद्यार्थ्यांच्या माध्यमातून ती परीक्षार्थींशी संपर्क साधत असे. पेपर मिळवून देण्याच्या बदल्यात लाखो रुपयांची मागणी केली जात होती. अटक करण्यात आलेला विद्यार्थी हा केवळ मध्यस्थ होता की त्याने स्वतःही या गैरप्रकाराचा फायदा घेतला, याचा तपास पोलीस करत आहेत.
या दोघांच्या अटकेमुळे आता या प्रकरणातील मुख्य सूत्रधार आणि ‘किंगपिन’ पर्यंत पोहोचणे पोलिसांना सोपे होणार आहे. हे रॅकेट केवळ पुण्यापुरते मर्यादित आहे की याचे धागेदोरे राज्याबाहेरही पसरलेले आहेत, या दृष्टीने तपास यंत्रणा काम करत आहेत.
या कारवाईमुळे नीट परीक्षेच्या पारदर्शकतेवर पुन्हा एकदा प्रश्नचिन्ह उपस्थित झाले असून, या प्रकरणातील मास्टरमाईंड कोण आहे, हे पाहणे आता महत्त्वाचे ठरणार आहे.
