राहुल गांधीं ‘टुकडे टुकडे गॅंग’ चे नेता, केंद्रीय मंत्री गिरीराज सिंह यांचा जबरदस्त हल्ला
नवी दिल्ली : केंद्रीय मंत्री गिरीराज सिंह यांनी सोमवारी लोकसभेतील विरोधी पक्षनेते राहुल गांधी यांच्यावर जोरदार हल्ला चढवला. गिरीराज सिंह यांनी राहुल गांधींना ‘टुकडे टुकडे गॅंग’ चा नेता असल्याचे म्हटले.
गिरीराज सिंह यांनी राहुल गांधी तसेच सोनिया गांधींवर निशाणा साधत दोघांवर देशद्रोहाचे गंभीर आरोप केले. केंद्रीय मंत्र्यांनी या दोघांवर जॉर्ज सोरोसशी संगनमत केल्याचा आरोप केला.
गिरीराज सिंह म्हणाले की, राहुल गांधी आणि सोनिया गांधी यांनी देशद्रोह केला आहे. राहुल गांधी जॉर्ज सोरोसची भाषा बोलत आहेत. जॉर्ज सोरोस देशविरोधी कारवायांमध्ये सहभागी आहे. अशा स्थितीत राहुल गांधी आणि सोनिया गांधी यांनी याचे उत्तर द्यावे.
भाजप खासदार निशिकांत दुबे यांनीही सोमवारी संसदेत काँग्रेस आणि जॉर्ज सोरोसचा मुद्दा उपस्थित केल्याने बराच गदारोळ झाला. यावर विरोधी पक्षाच्या खासदारांनी तीव्र आक्षेप घेतला. मात्र विरोधाला न जुमानता निशिकांत दुबे थांबले नाहीत आणि सत्य जाणून घेणे हा जनतेचा अधिकार असल्याचे सांगितले.
जॉर्ज सोरोस यांचा काँग्रेस पक्षाशी संबंध
दुबे म्हणाले की, देशातील जनतेला विरोधी पक्ष आणि विदेशी शक्ती यांच्यातील संबंध जाणून घेण्याचा अधिकार आहे. हा मुद्दा संसदेत मांडणे हा खासदार म्हणून आमचा हक्क आहे. जॉर्ज सोरोस सारख्या लोकांना देशाचे विभाजन करून खलिस्तानचे समर्थन करायचे आहे. त्यांचे काँग्रेस पक्षाशी संबंध आहेत.
दरम्यान, संसदेत सरकार आणि विरोधक यांच्यातील गोंधळ सुरूच आहे. लोकसभेत आधी अदानी, संभळ या मुद्द्यांवरून आणि नंतर भाजपच्या राहुल गांधींवर गंभीर आरोपांवरून गदारोळ झाला. तसेच नोटांचे बंडल मिळाल्यावरून राज्यसभेचे कामकाज गदारोळात राहिले. आजही दोन्ही सभागृहात बराच गदारोळ झाला.
