प्लाॅट खरेदीदारांना वंचित ठेवणाऱ्यावर अदखलपात्र गुन्हा दाखल 

पुणे : पिंपरी चिंचवड हद्दीतील मौजे चऱ्होली – वडमुखवाडी येथील प्लाॅट खरेदीदारांना त्यांच्या हक्कांपासून वंचित करु पाहणाऱ्या जमीन मालकाच्या वंशजावर दिघी पोलिसांनी अदखलपात्र गुन्हा दाखल केला. ‘महाराष्ट्र मिशन’ ने या संदर्भात पीडितांना दिलासा मिळवून दिला.

गट नंबर १७५/१/१ येथील एकूण क्षेत्र ५ एकर २० गुंठे मूळ ज्ञानेश्वर कोंडिबा गिलबिले, नंदकुमार कोंडिबा गिलबिले यांच्याकडून ४०/५० जणांनी १९९१ मध्ये ५ ते १० हजार रुपये गुंठा या दराने विकत घेतले होते.

संबंधित जागेमध्ये नंदकुमार गिलबिले यांचे नातू गेल्या दोन अडीच वर्षांपासून समाधान गिलबिले हे शिरकाव करु देत नव्हते. ताबा घेऊ देत नव्हते. त्या जमिनी संदर्भात असलेला खरेदीदारांच्या नावाचा फलक त्यांनी बळाचा वापर करून पाडून टाकला होता.

याच जमिनीवर त्यांनी त्यांचा कोणताही हक्क नसताना बेकायदेशीरपणे डांबरीकरण करुन रस्ता तयार केला आहे. मालकीच्या जागेत ताबा मिळावा म्हणून काही जणांनी दिवाणी न्यायालयात अर्ज केला असून तो दावा प्रलंबित आहे. गिलबिले यासाठी हजर राहत नाहीत. त्यामुळे प्लाॅट खरेदीदारांमध्ये चिंता होती.

शांततामय मार्गाने ठिय्या आंदोलन करण्याचा निर्धार करून न्याय मागण्यासाठी ज्येष्ठवयीन नागरिक दिघी पोलीस ठाण्यात गेले. वरिष्ठ पोलीस निरीक्षक प्रमोद वाघ यांच्यापुढे गाऱ्हाणे मांडले. ‘महाराष्ट्र मिशन’ च्या प्रतिनिधीनेही या पीडितांची बाजू मांडली. त्यामुळे संबंधितावर अदखलपात्र गुन्हा दाखल करण्याचे आदेश वाघ यांनी दिले. पीडितांना दिलासा मिळाल्याने त्यांनी . ‘महाराष्ट्र मिशन’ चे आभार मानले.