नवी दिल्ली : देशातील आरोग्य सेवा क्षेत्रात स्वतःला झोकून देऊन काम करणाऱ्या १५ परिचारिका आणि वैद्यकीय कर्मचाऱ्यांना आज ‘राष्ट्रीय फ्लोरेन्स नाईटिंगेल’ पुरस्काराने सन्मानित करण्यात आले. नवी दिल्लीतील राष्ट्रपती भवनात आयोजित एका विशेष सोहळ्यात राष्ट्रपती द्रौपदी मुर्मू यांच्या हस्ते हे प्रतिष्ठित पुरस्कार प्रदान करण्यात आले.
फ्लोरेन्स नाईटिंगेल पुरस्कार हा परिचारिकांच्या समर्पण, निस्पृह सेवा आणि असामान्य धैर्यासाठी दिला जाणारा सर्वोच्च राष्ट्रीय सन्मान आहे. आजच्या सोहळ्यात देशाच्या विविध भागांतून निवडलेल्या १५ आरोग्य कर्मचाऱ्यांना त्यांच्या उत्कृष्ट कामगिरीबद्दल गौरवण्यात आले. यामध्ये दुर्गम भागात सेवा देणाऱ्या परिचारिकांपासून ते आपत्कालीन परिस्थितीत महत्त्वाची भूमिका बजावणाऱ्या वैद्यकीय कर्मचाऱ्यांचा समावेश आहे.
पुरस्कार प्रदान केल्यानंतर राष्ट्रपतींनी सर्व विजेत्यांचे अभिनंदन केले. आरोग्य व्यवस्था बळकट करण्यात परिचारिकांचा वाटा अत्यंत महत्त्वाचा असून, रुग्णसेवेच्या कार्यात त्या ‘आधारस्तंभ’ म्हणून काम करतात, अशा शब्दांत त्यांनी परिचारिकांच्या कार्याचा गौरव केला.
या पुरस्काराचे स्वरूप पदक, प्रमाणपत्र आणि रोख रक्कम असे आहे. हा सन्मान मिळाल्यामुळे आरोग्य कर्मचाऱ्यांमध्ये उत्साहाचे वातावरण असून, यामुळे इतरांनाही रुग्णसेवेसाठी प्रेरणा मिळेल, असा विश्वास व्यक्त केला जात आहे.
या सोहळ्याला केंद्रीय आरोग्य मंत्रालयातील वरिष्ठ अधिकारी आणि आरोग्य क्षेत्रातील मान्यवर उपस्थित होते.
