पुणे : महाराष्ट्र राज्य परीक्षा परिषदेमार्फत घेतली जाणारी ‘महाराष्ट्र शिक्षक पात्रता परीक्षा’ (Maha-TET) यंदा पुढे ढकलण्यात आली आहे. पूर्वघोषित वेळापत्रकानुसार ही परीक्षा येत्या २१ जून रोजी होणार होती, मात्र आता ती २८ जून रोजी घेतली जाईल, अशी घोषणा परीक्षा परिषदेने केली आहे. राष्ट्रीय चाचणी संस्थेकडून (NTA) त्याच दिवशी इतर महत्त्वाची परीक्षा आयोजित केल्याने हा निर्णय घेण्यात आला आहे.
यंदा २१ जून रोजीच राष्ट्रीय चाचणी संस्थेमार्फत (NTA) ‘नीट’ (NEET) परीक्षा आयोजित करण्यात आली आहे. दोन्ही मोठ्या परीक्षा एकाच दिवशी आल्यामुळे परीक्षा केंद्रांवर प्रचंड ताण निर्माण होण्याची शक्यता होती. अनेक उमेदवारांना परीक्षा केंद्र मिळण्यात अडचणी येू नयेत आणि प्रशासकीय यंत्रणेवर ताण पडू नये, यासाठी महाराष्ट्र राज्य परीक्षा परिषदेने सामंजस्याची भूमिका घेत ‘महा-टीईटी’ एक आठवडा पुढे ढकलण्याचा निर्णय घेतला आहे.
या निर्णयामुळे परीक्षा केंद्रांचे नियोजन करणे प्रशासनाला सोपे जाणार आहे, तसेच परीक्षा देणाऱ्या उमेदवारांची धावपळ टळणार आहे. सुधारित वेळापत्रकानुसार आता रविवार, २८ जून रोजी ही परीक्षा राज्यभरातील विविध केंद्रांवर पार पडेल.
उमेदवारांनी परीक्षेच्या हॉलतिकीट आणि इतर अपडेट्ससाठी महाराष्ट्र राज्य परीक्षा परिषदेच्या अधिकृत संकेतस्थळाला भेट द्यावी, असे आवाहन प्रशासनातर्फे करण्यात आले आहे.
