केरळचे माजी मुख्यमंत्री पी. विजयन यांच्या घरावर ‘ईडी’ची धाड; १२ ठिकाणी छापेमारीने देशात खळबळ!
विशेष प्रतिनिधी, महाराष्ट्र मिशन
तिरुवनंतपुरम : केरळचे माजी मुख्यमंत्री आणि सीपीआय(एम) चे ज्येष्ठ नेते पी. विजयन यांच्या अडचणीत मोठी वाढ झाली आहे. कोचीन मिनरल्स अँड रुटाईल लिमिटेड (CMRL) मनी लाँड्रिंग प्रकरणाच्या संदर्भात सक्तवसुली संचालनालयाने (ED) आज, बुधवार (२७ मे) रोजी सकाळीच माजी मुख्यमंत्री पी. विजयन यांच्या तिरुवनंतपुरम येथील निवासस्थानासह केरळमधील सुमारे १२ ठिकाणी एकाच वेळी छापे टाकले आहेत. या धडक कारवाईमुळे केरळसह देशाच्या राजकीय वर्तुळात प्रचंड खळबळ उडाली आहे.
मिळालेल्या माहितीनुसार, प्रिव्हेंशन ऑफ मनी लाँड्रिंग ॲक्ट (PMLA) अंतर्गत ही शोधमोहीम राबवली जात आहे. ‘कोचीन मिनरल्स अँड रुटाईल लिमिटेड’ (CMRL) या खाजगी कंपनीने २०१८ ते २०१Report दरम्यान माजी मुख्यमंत्री पी. विजयन यांच्या कन्या टी. वीणा यांच्या ‘एक्सालॉजिक सोल्यूशन्स’ या आयटी कंपनीला तब्बल १.७२ कोटी रुपयांचे बेकायदेशीर पेमेंट केल्याचा आरोप आहे. विशेष म्हणजे, या आयटी कंपनीने CMRL ला कोणतीही व्यावसायिक सेवा दिली नसतानाही हे कोट्यवधींचे व्यवहार झाल्याचे प्राप्तीकर विभागाच्या तपासात समोर आले होते. या कथित ‘मंथली पे-ऑफ’ प्रकरणानंतर ‘ईडी’ने मनी लाँड्रिंगचा गुन्हा दाखल करून तपास सुरू केला होता.
उच्च न्यायालयाच्या निर्णयानंतर तातडीने कारवाई
विशेष बाब म्हणजे, कालच (मंगळवारी) केरळ उच्च न्यायालयाने या प्रकरणातील ईडीच्या कारवाईला आव्हान देणारी आणि तपास रद्द करण्याची मागणी करणारी CMRL ची याचिका फेटाळून लावली होती. न्यायालयानं ईडीला तपास पुढे नेण्यास हिरवा कंदील दाखवल्यानंतर अवघ्या २४ तासांच्या आत केंद्रीय तपास यंत्रणेने माजी मुख्यमंत्र्यांच्या घरासह त्यांच्याशी संबंधित इतर ठिकाणांवर, तसेच त्यांचे जावई आणि वरिष्ठ अधिकाऱ्यांच्या मालमत्तांवर छापे टाकण्यास सुरुवात केली.
या प्रकरणी केंद्रीय तपास यंत्रणेने (ED) पी. विजयन यांची कन्या वीणा विजयन यांची आधीच चौकशी केली असून, आता थेट माजी मुख्यमंत्र्यांच्या निवासस्थानावर धाड पडल्याने आगामी काळात विजयन यांचीही चौकशी होण्याची दाट शक्यता वर्तवली जात आहे. या कारवाईमुळे केरळमधील राजकीय वातावरण कमालीचे तापले असून विरोधी पक्षांनी माजी मुख्यमंत्र्यांच्या राजीनाम्याची व चौकशीची मागणी तीव्र केली आहे.
