जम्मू : जम्मू-काश्मीरच्या बडगाम जिल्ह्यात लष्कर-ए-तोयबाचा वरिष्ठ कमांडर मोहम्मद आसिफ उर्फ हाशिम मूसा ठार झाल्याच्या भारतीय सुरक्षा यंत्रणांच्या दाव्यावरून भारत आणि पाकिस्तानमध्ये नवा वाद निर्माण झाला आहे. ३० सप्टेंबरला बडगाममध्ये झालेल्या चकमकीत मूसा ठार झाल्याचे भारतीय लष्कराने सांगितले. त्यानंतर पाकिस्तानने हा दावा फेटाळत मोहम्मद आसिफ नावाच्या निवृत्त पाकिस्तानी सैनिकाला माध्यमांसमोर आणले.
भारतीय लष्कराच्या माहितीनुसार, बडगाममधील खानसाहिब परिसरात गुप्त माहितीच्या आधारे संयुक्त कारवाई करण्यात आली. त्यानंतर झालेल्या चकमकीत मूसा ठार झाला आणि त्याचा मृतदेह तसेच युद्धसामग्री जप्त करण्यात आल्याचे लष्कराने म्हटले आहे. केंद्रीय गृह मंत्रालयानेही मूसा हा लष्कर-ए-तोयबाच्या जम्मू-काश्मीरमधील महत्त्वाच्या दहशतवादी नेटवर्कशी संबंधित असल्याचे म्हटले आहे.
पाकिस्तानने नेमका काय दावा केला?
पाकिस्तानी लष्कराचे प्रवक्ते लेफ्टनंट जनरल अहमद शरीफ चौधरी यांनी १ ऑक्टोबरला पत्रकार परिषद घेत भारताचा दावा फेटाळला. यावेळी त्यांनी मोहम्मद आसिफ नावाच्या निवृत्त सैनिकाला पत्रकारांसमोर आणले. संबंधित व्यक्तीने आपण २०२३मध्ये पाकिस्तानी लष्करातून निवृत्त झाल्याचे आणि सध्या जिवंत असल्याचे सांगितले. त्याने स्वतःवरील दहशतवादाशी संबंधित आरोपही फेटाळले.
मूसा कोण होता?
भारतीय अधिकाऱ्यांच्या माहितीनुसार, हाशिम मूसा हा पाकिस्तानस्थित लष्कर-ए-तोयबाचा वरिष्ठ कमांडर होता. जम्मू-काश्मीरमधील अनेक मोठ्या दहशतवादी हल्ल्यांशी त्याचा संबंध असल्याचा आरोप सुरक्षा यंत्रणांनी केला आहे. त्याच्यासह कार्यरत असलेल्या चार सदस्यांच्या गटातील इतर सदस्य यापूर्वी वेगवेगळ्या कारवायांमध्ये ठार झाले होते.
ओळखीचा वाद आता केंद्रस्थानी
भारताने चकमकीत ठार झालेला दहशतवादी मोहम्मद आसिफ उर्फ हाशिम मूसा असल्याचे ठामपणे सांगितले आहे, तर पाकिस्तानने समोर आणलेला मोहम्मद आसिफ आपणच असल्याचा दावा केला आहे. त्यामुळे बडगाममध्ये ठार झालेल्या व्यक्तीची ओळख हा या संपूर्ण प्रकरणातील प्रमुख प्रश्न बनला आहे. दोन्ही देशांकडून परस्परविरोधी दावे समोर आल्याने या प्रकरणातील पुढील अधिकृत पुरावे आणि तपासाकडे लक्ष लागले आहे.
