एका २२ वर्षीय तरुणाने पोलीस चौकीत गोंधळ घालत पोलिसांना शिवीगाळ, तरुणाविरुद्ध गुन्हा दाखल
पुणे प्रतिनिधी : पोलीस चौकीत गोंधळ घालून पोलीस कर्मचाऱ्यांना शिवीगाळ केल्याप्रकरणी एका तरुणाविरुद्ध विश्रामबाग पोलिसांनी गुन्हा दाखल केला. शनिवार पेठ पोलीस चौकीत ही घटना घडली. याप्रकरणी एका २२ वर्षीय तरुणाविरुद्ध गुन्हा दाखल करण्यात आला. याबाबत पोलीस शिपाई प्रसाद ठाकूर यांनी विश्रामबाग पोलीस ठाण्यात फिर्याद दिली आहे. गुन्हा दाखल करण्यात आलेला तरुण नारायण पेठेत राहायला आहे. पोलिसांनी दिलेल्या माहितीनुसार, नववर्षाच्या मध्यरात्री एकच्या सुमारास दुचाकीस्वार तरुण भरधाव वेगात ओंकारेश्वर मंदिरापासून निघाला होता. त्यावेळी त्याने एका दुचाकीस्वार महिलेला धडक दिली. अपघातात महिलेच्या दुचाकीचे नुकसान झाले. त्यानंतर महिलेने या घटनेची माहिती पोलिसांना दिली. बंदोबस्तावरील पोलिसांनी तरुणाला ताब्यात घेतले. त्याला शनिवार पेठ पोलीस चौकीत नेले. तेव्हा त्याने पोलीस चौकीत गोंधळ घालण्यास सुरुवात केली.
पोलीस चौकीत त्याने तक्रारदार महिलेसह पोलिसांना शिवीगाळ केली. पोलीस शिपाई ठाकूर आणि इनामदार यांना शिवीगाळ करुन धक्काबुक्की केली. सरकारी कामात अडथळा आणल्याप्रकरणी तरुणाविरुद्ध गुन्हा दाखल करण्यात आला. पोलीस उपनिरीक्षक सुप्रिया पंढरकर तपास करत आहेत.
