नांदेडमध्ये पोलिसांचे ‘ऑपरेशन क्रॅक डाऊन’; कांदा मार्केटमधून ३० लाखांचा प्रतिबंधित गुटखा जप्त!
विशेष प्रतिनिधी/नांदेड : महाराष्ट्र शासनाने बंदी घातलेल्या सुगंधी पानमसाला आणि गुटख्याच्या बेकायदेशीर साठ्याविरोधात नांदेड ग्रामीण पोलिसांनी आज एक मोठी आणि धडक कारवाई केली आहे. पोलिसांच्या ‘ऑपरेशन क्रॅक डाऊन’ (Operation Crackdown) अंतर्गत तब्बल ३० लाख ६३ हजार ६५० रुपये किमतीचा मुद्देमाल जप्त करण्यात आला आहे. ही कारवाई शहरातील नामांकित कांदा मार्केट परिसरात करण्यात आली.
मिळालेल्या माहितीनुसार, नांदेड ग्रामीण पोलीस ठाण्याच्या पथकाला कांदा मार्केट परिसरात प्रतिबंधित गुटख्याची मोठी खेप आणली गेल्याची गुप्त माहिती मिळाली होती. या माहितीच्या आधारे पोलिसांनी ‘ऑपरेशन क्रॅक डाऊन’ अंतर्गत तात्काळ या परिसरात सापळा रचून छापा टाकला. या छाप्यात पोलिसांना वेगवेगळ्या नामांकित कंपन्यांचा सुगंधी पानमसाला आणि गुटख्याचा मोठा साठा आढळून आला, ज्याची बाजारपेठेत किंमत ३० लाख ६३ हजार ६५० रुपये आहे. पोलिसांनी हा सर्व मुद्देमाल जागीच जप्त केला आहे.
या बेकायदेशीर गुटखा साठवणूक आणि वाहतूक प्रकरणी पोलिसांनी रईस मोहम्मद अमीर मोहम्मद या संशयित आरोपीविरुद्ध गुन्हा दाखल केला आहे. या रॅकेटमध्ये आणखी कोणाचा हात आहे का, तसेच हा एवढा मोठा साठा कुठे पाठवला जाणार होता, याचा तपास आता पोलीस करत आहेत.
नांदेड ग्रामीण पोलिसांच्या या धडक कारवाईमुळे अवैध गुटखा माफियांचे धाबे दणाणले असून, नागरिकांमधून पोलिसांच्या या कामगिरीचे कौतुक होत आहे. या प्रकरणाचा पुढील तपास नांदेड ग्रामीण पोलीस करत आहेत.
