मध्य प्रदेशातील शस्त्रास्त्र निर्मिती, तस्करीचे रॅकेट पुणे शहर पोलिसांकडून उध्वस्त
पुणे : महाराष्ट्र मध्य प्रदेश सीमेवरील उमरटी शिकलगार आर्म्स (युएसए) या ब्रँड नावाखाली मोठ्या प्रमाणात शस्त्रास्त्र निर्मिती करुन त्याची तस्करी करण्याचे रॅकेट पुणे शहर पोलिसांनी उध्वस्त केले. पुण्यापासुन ५०० किलोमीटर लांब, दुसऱ्या राज्यात जाऊन मोठी कारवाई करत आंतरराज्यीय कारवाईत ३६ संशयितांना ताब्यात घेतले. पुणे पोलिसांच्या या कारवाईचे कौतुक होत असून पोलीस उप-आयुक्त, परिमंडळ-४ आणि गुन्हे शाखेच्या विशेष पथकाने ही कारवाई केली.
उमरटी, तहसिल लेघवा जि. बडवाणी, राज्य मध्यप्रदेश येथे मोठ्या प्रमाणात बेकायदेशीर शस्त्रास्त्रे (अग्निशस्त्र) तयार करुन पुरवठा करून आंतरराज्य तस्करी केली जाते अशी माहिती एका तपासात निष्पन्न झाली होती.
बेकायदेशीर शस्त्रांच्या निर्मितीमध्ये सहभागी असलेल्या ३६ संशयित व्यक्तींना ताब्यात घेण्यात आले. मोठ्या संख्येने शस्त्रे आणि शस्त्र बनविण्याचे साहित्य जप्त करण्यात आले. बेकायदेशीर शस्त्रांच्या मोल्डिंग आणि निर्मितीसाठी वापरल्या जाणाऱ्या ५० भट्टया घटनास्थळीच नष्ट करण्यात आल्या. अत्याधुनिक पद्धतीने शस्त्रास्त्रे भरण्याचे साहित्य जप्त करण्यात आले.
पोलीस उप-आयुक्त, परिमंडळ-४, सोमय मुंडे यांच्या नेतृत्वाखाली परिमंडळ ४ व गुन्हे शाखेच्या पथकाने मध्यप्रदेश पोलीसांच्या सहकार्याने २२ नोव्हेंबर रोजी पहाटे सदर ठिकाणी छापा टाकून कारवाई केली
विमानतळ पोलीस स्टेशनमध्ये गु.रनं. ५५८/२०२५ अंतर्गत हे कॉम्बींग ऑपरेशन राबविण्यात आले. सदर आरोपीवर आर्म अॅक्ट कलम ३ (२५) सह भा.न्या.सं.क. १११, महाराष्ट्र पोलीस अधिनियम क. १४२, ३७ (१) सह १३५ मधील ११ अग्निशस्त्रे जप्त करण्यात आली होती.
काळेपडळ पोलीस स्टेशन येथील ४ अग्निशस्त्रे, खं.वि.प.-१ येथील २ अग्निशस्त्रे, खं.वि.प.-२ येथील ३ अग्निशस्त्रे, युनिट ३ येथील १ अग्निशस्त्रे अशी एकुण २१ जप्त बेकायदेशीर अग्निशस्त्राच्या अनुषंगाने दाखल गुन्ह्यातील तपासाच्या आधारे पोलिसांना उमरटी शिकलगार आर्म्सची माहिती समजली.
आरोपींच्या चौकशीतून आणि तांत्रिक पुराव्यांवरुन असे दिसून आले की, याठिकाणी या गावातच कारखाना असून सदर ठिकाणावरुन बेकायदेशीररित्या अग्निशस्त्र
तयार करुन, पुरवठा करुन आंतरराज्य तस्करी केली जाते. बेकायदेशीर शस्त्रांचा पुरवठा करण्याच्या साखळीचा शोध घेऊन अंतिम बेकायदेशीर शस्त्र प्राप्तधारकांची माहिती निष्पन्न करण्यासाठी तपास चालु आहे. स्थानिक पोलिसांच्या कार्यक्षमतेवर मात्र प्रश्नचिन्ह निर्माण झाले आहे.
विशेष मोहिम दरम्यान पोलीस अधिकारी व पोलीस अंमलदार यांचे सुरक्षिततेसाठी क्विक रिस्पॉन्स टीम (क्युआरटी), आर्म व अॅम्युनिशनसह सोबत ठेवलेली होती. या कारवाई दरम्यान मोबाईल सरव्हेलन्स व्हेईकल्स, तात्पुरते वायरलेस नेटवर्क, बुलेट प्रुफ (बीपी) जॅकेट आणि बॉडी वॉर्न कॅमेरे यासारख्या महत्त्वपुर्ण तांत्रिक सहाय्याचा देखील वापर करण्यात आला आहे.
सदरची कारवाई पोलीस आयुक्त अमितेश कुमार, पोलीस सह आयुक्त रंजन कुमार शर्मा, अप्पर पोलीस आयुक्त, पुर्व प्रादेशिक विभाग मनोज पाटील, अप्पर पोलीस आयुक्त, गुन्हे, पंकज देशमुख, पोलीस उप-आयुक्त, गुन्हे, निखिल पिंगळे यांच्या मार्गदर्शनाखाली करण्यात आली.
गुन्हे शाखेचे पोलीस निरीक्षक वाहिद पठाण, सहाय्यक पोलीस निरीक्षक नितीन नाईक, मदन कांबळे, कल्याणी कासोदे, पोलीस अंमलदार पठाण, देशमुख, कारखेले, मुंढे, पवार, तांबेकर, रोकडे, रणपिसे, माने, खरात, पानसरे यांनी सहभाग घेतला.
