अरे काय चाललेय? एका मुलीचा संशयास्पद मृत्यू; ३ वर्षांच्या मुलीचा खून, दोन ७ वर्षीय बालिकांवर अमानुष अत्याचार

महाराष्ट्र मिशन/विशेष प्रतिनिधी 

मुंबई : नांदेड जिल्ह्यात अर्धापूर तालुक्यातील संत सावता माळी नगर येथील शितल मोरे हिचा संशयास्पद मृत्यू, नाशिकच्या मालेगाव येथे तीन वर्षाच्या लहान मुलीवर लैंगिक अत्याचार करून हत्या करण्यात आल्याची घटना, ७ वर्षाच्या विद्यार्थीनीवर विद्येचे मंदिर असलेल्या शाळेतसुद्धा मुली सुरक्षित नसल्याचे नांदेड मध्ये आणि जुन्नरच्या ओतूर मध्ये गरीब शेतकरी कुटुंबातील सात वर्षीय निरागस बालिकेवर झालेला अत्यंत अमानुष लैंगिक अत्याचार या तिन्ही घटनांमुळे महाराष्ट्रात महिलांच्या सुरक्षिततेचा सरकारचा दावा फुसका असल्याचे दिसून येते.

राज्यातील कायदा सुव्यवस्थेची स्थिती अत्यंत चिंताजनक आहे. कोयता गँग, ड्रग्ज माफिया, रेती माफिया, आका, खोक्या यांचा नंगानाच सुरु आहे. सत्ताधारी पक्षाच्या आशिर्वादाने गुंड खुलेआम फिरत आहेत. मागील काही महिन्यातील घटना पाहता सरकारच्या आशिर्वादाने गुंडगिरी फोफावल्याचे दिसते.

अर्धापूर येथील शितल नामक मुलगी १६ नोव्हेंबर रोजी मित्राच्या खोलीत गळफास घेतलेल्या अवस्थेत आढळली होती. पण कुटुंबीयांनी ठाम आरोप केला की हा खून आहे, आत्महत्या नव्हे. वंचित बहुजन आघाडीचे नेते बाळासाहेब आंबेडकर यांच्या सहकार्याने यांची दबावात्मक भूमिका आणि समाजाची अभूतपूर्व साथ यामुळे पोलिसांना शेवटी ऍट्रोसिटी, बलात्कार, खून, लूट आणि इतर गंभीर कलमांखाली गुन्हा दाखल करावा लागला.

शितल हिच्या अंत्ययात्रेला सुरुवात झाली, तेव्हा जनसमुदाय शितलच्या घरासमोर उभा होता. प्रत्येकाच्या चेहऱ्यावर संताप, डोळ्यांत अश्रू आणि मनात एकच प्रश्न होता “आपल्या बहिणीचा खून कोणी केला?” ‘बुद्धं शरणं गच्छामि’चा जप करत हजारो लोक निघाले. संपूर्ण गाव एका मुलीच्या मृत्यूने स्तब्ध झाले होते. अतिशय वेदनादायी वातावरणात अंत्यसंस्कार करण्यात आले.

री-पोस्टमार्टममुळे सत्यता उघड

या दुर्दैवी मुलीचे विष्णुपुरी शासकीय रुग्णालयात झालेले पहिले पोस्टमार्टम कुटुंबाला मान्य नव्हते. हॉस्पिटलवरील अविश्वास, राजकीय दबाव आणि अनेक अनियमितता बघता मृतदेह ताब्यात घेण्यासही कुटुंबाने नकार दिला. शेवटी वंचित बहुजन आघाडीच्या १६-१७ तासांच्या संघर्षामुळे मृतदेह छत्रपती संभाजीनगर येथील घाटी हॉस्पिटलमध्ये री-पोस्टमार्टमसाठी पाठवावा लागला.

 री-पोस्टमार्टममधील धक्कादायक निष्कर्ष 

मृत्यूचे कारण गळफास असले तरी पण शरीरावर अनेक ठिकाणी जखमा, खरचटण्याच्या व ओरखड्यांच्या खुणा या खुणा आत्महत्येची नव्हेत, तर झटापट, अत्याचार किंवा खुनाचे संकेत असल्याचे तज्ज्ञांनी नमूद केले. शितलला आधी अत्याचार करून मारण्यात आले आणि नंतर आत्महत्या वाटावी असा बनाव रचला गेला असा संशय अधिक गडद झाला.

घटनेनंतर २४ तास उलटूनही पोलिसांनी गुन्हा दाखल केला नाही. बडा राजकीय नेता आरोपींच्या मदतीला असल्याचा संशय जिल्ह्यात पसरला. प्रशासनावरील राग इतका वाढला की संपूर्ण जनसमुदाय नांदेड ग्रामीण पोलीस स्टेशनमध्ये तब्बल मध्यरात्रीपर्यंत बसला. या प्रकरणाला आता गंभीर वळण मिळाले असून तपास अधिक तीव्र होणार आहे. पोलीस राजकीय दबावाखाली आल्यास वंचित बहुजन आघाडीच्या वतीने रस्त्यावर उतरून मोठे आंदोलन करणार आहोत, असा इशारा मान्यवरांनी दिला.

मालेगावात ३ वर्षांच्या चिमुरडीची अत्याचार करून हत्या 

दरम्यान, नाशिकच्या मालेगावमधील ३ वर्षांच्या चिमुरडीच्या हत्या प्रकरणाने महाराष्ट्र हादरला. पीडितेच्या शेजारी राहणाऱ्या आरोपीने तिच्यावर अत्याचार करून तिची हत्या केली. या प्रकरणी एका २३ वर्षीय तरुणाला अटक करण्यात आली.

नागरिकांमध्ये निर्माण झालेला संताप पाहून आरोपीला न्यायालयात हजर करणे कठीण झाले. त्यामुळे, कायदा व सुव्यवस्थेचा प्रश्न निर्माण होऊ नये म्हणून न्यायालयाच्या परवानगीने आरोपीला व्हीडिओ कॉन्फरन्सद्वारे हजर करण्यात आले.

रिमांड रिपोर्ट सादर करत आरोपीला ७ दिवसांची पोलीस कोठडी देण्यात यावी, अशी मागणी तपास अधिकाऱ्यांनी केली. या प्रकरणी आरोपीच्या वतीने त्याच्या कुटुंबियाकडून कोणतीही प्रतिक्रिया आलेली नाही.

तीन वर्षाच्या लहान मुलीवर लैंगिक अत्याचार करून हत्या करण्यात आल्याची घटना संतापजनक आहे. राज्यात गुन्हेगारांना कायद्याची भिती राहिलेली नसून महिला अत्याचाराचे प्रमाण वाढलेले आहे. मालेगाव प्रकरण फास्ट ट्रॅक कोर्टात चालवून आरोपीला फाशीची शिक्षा दिली पाहिजे,अशी लोकभावना आहे.

नांदेडमध्ये शिक्षकाचा ७ वर्षाच्या विद्यार्थीनीवर अत्याचार 

दरम्यान, नांदेडमधून शिक्षकीपेशाला काळिमा फासणारी घटना उघडकीस आली. शिक्षकाने ७ वर्षाच्या विद्यार्थिनीवर बलात्कार केला. मुलगी ज्या शाळेत शिकत होती त्याच शाळेत आरोपी शिक्षक होता. या घटनेनंतर पोलिसांनी शिक्षकाला बेड्या ठोकल्या.

भाग्यनगर पोलीस स्थानकात तक्रार दाखल झाली. या तक्रारीवरून आरोपी शिक्षक विशाल लोखंडे याच्यावर ‘पोक्सो’ अंतर्गत गुन्हा दाखल करण्यात आला. हा खटला फास्टट्रॅक कोर्टात चालवण्याची विनंती न्यायालयाला करणार असल्याचे पोलिसांनी सांगितले. विद्येचे मंदिर असलेल्या शाळेतसुद्धा मुली सुरक्षित नाहीत ही धक्कादायक बाब समोर आली.

पुण्यात ७ वर्षीय निरागस बालिकेवर अमानुष लैंगिक अत्याचार

दरम्यान, ओतूर (ता. जुन्नर) येथील स्थानिक गरीब शेतकरी कुटुंबातील सात वर्षीय निरागस बालिकेवर १६ नोव्हेंबर रोजी अत्यंत अमानुष लैंगिक अत्याचार झाल्याची घटना समोर आली.

आरोपी ऊसतोड मुकादमाचा मेहुणा असून संबंधित मुकादम मागील दहा वर्षांपेक्षा अधिक काळ त्या परिसरात राहत असल्याची माहिती मिळाली आहे. यापूर्वीदेखील आरोपीने पीडितेच्या मोठ्या बहिणीवर अत्याचार केल्याचा धक्कादायक तपास समोर आला आहे. गुन्ह्यानंतर आरोपीने पळण्याचा प्रयत्न केला; मात्र संतप्त ग्रामस्थांनी त्याला पकडून पोलिसांच्या ताब्यात दिले. पोलिसांनी तत्काळ अटक करून ‘पॉक्सो’ कायदा आणि भारतीय न्याय संहिता अंतर्गत गंभीर गुन्हा नोंदवला आहे. पीडीत बालिका सध्या गंभीर मानसिक धक्क्यात असून तिच्यावर ससून रुग्णालयात उपचार सुरू आहेत.

पीडित बालिकांना न्याय मिळावा

अल्पवयीन बालिकांवरील अत्याचार हा समाजाच्या सुरक्षिततेला थेट धोका आहे. अशा गुन्ह्यांविरुद्ध शून्य सहिष्णुतेची भूमिका घेणे अत्यावश्यक आहे. पीडितेला न्याय मिळेपर्यंत आणि सुरक्षित वातावरण मिळेपर्यंत या प्रकरणात पोलिस प्रशासनाने तातडीने कारवाई केली असली, तरी आरोपींना कठोर शिक्षा होऊन पीडित बालिकांना न्याय मिळावा अशी जनसामान्यांची भावना आहे.