जेजुरी: पालखी सोहळ्यादरम्यान भीषण अपघात; ट्रकच्या धडकेत तीन महिला वारकऱ्यांचा मृत्यू
जेजुरी (पुणे): श्री संत ज्ञानेश्वर महाराज पालखी सोहळ्याच्या पार्श्वभूमीवर सासवड-जेजुरी मार्गावर सोमवारी सकाळी एक भीषण अपघात घडला. सासवडहून जेजुरीकडे मार्गक्रमण करणाऱ्या वारकऱ्यांच्या दिंडीतील सात महिलांना एका ट्रकने जोरदार धडक दिली. या दुर्दैवी घटनेत सांगली जिल्ह्यातील कसबेडिग्रज गावच्या ३ महिला वारकऱ्यांचा जागीच मृत्यू झाला, तर ४ महिला गंभीर जखमी झाल्या आहेत.
◾अपघाताचा घटनाक्रम:
सोमवारी सकाळी सासवड-जेजुरी मार्गावरील बेलसर टोलनाक्याजवळ असलेल्या साईदीप लॉज परिसरात ही दुर्घटना घडली. नांदेड जिल्ह्यातील लोहा तालुक्यातील रघुनाथ महाराज पोखरबिसीकर दिंडीचा हा ट्रक होता. प्रत्यक्षदर्शींच्या माहितीनुसार, ट्रक चालकाने आजारपणामुळे औषध घेतले होते, ज्यामुळे त्याला गाडी चालवताना अचानक ग्लानी आली. नियंत्रण सुटल्याने ट्रक थेट वारकरी महिलांच्या अंगावर गेला.
◾मृतांची नावे:
१. राजश्री शंकर भोसले
२. माधवी राजाराम सरवडे
३. नंदा पवार
(सर्व रा. कसबेडिग्रज, जि. सांगली)
◾प्रशासनाची भूमिका:
अपघाताची माहिती मिळताच पोलीस अधीक्षक संदीपसिंग गिल आणि जेजुरी पोलीस घटनास्थळी दाखल झाले. जखमींना तातडीने जेजुरीतील खासगी रुग्णालयात उपचारासाठी हलवण्यात आले असून, त्यांच्यावर उपचार सुरू आहेत. अपघात करणाऱ्या ट्रक चालकाला पोलिसांनी ताब्यात घेतले असून, या प्रकरणाचा अधिक तपास केला जात आहे.
या घटनेमुळे संपूर्ण वारकरी संप्रदायात मोठी शोककळा पसरली असून, उत्साहाच्या वातावरणात असलेल्या पालखी सोहळ्यावर या अपघातामुळे दुःखाचे सावट निर्माण झाले आहे.
◾उपमुख्यमंत्री सुनेत्रा पवार यांची संवेदनशीलता:
अपघाताची माहिती मिळताच उपमुख्यमंत्री सुनेत्रा पवार यांनी फेसबुकच्या माध्यमातून आपल्या भावना व्यक्त केल्या. त्या म्हणाल्या, “आज सासवड-जेजुरी मार्गावर झालेली दुर्घटना अत्यंत वेदनादायी आणि मन हेलावून टाकणारी आहे. या अपघातात ज्या तीन वारकरी भगिनींचा दुर्दैवी मृत्यू झाला, त्यांना मी भावपूर्ण श्रद्धांजली अर्पण करते.”
त्या पुढे म्हणाल्या की, “मी स्वतः रुग्णालयात जाऊन जखमी वारकरी भगिनींची भेट घेतली आहे. त्यांच्या उपचारात कोणतीही कमतरता राहणार नाही, यासाठी जिल्हाधिकारी, पोलीस अधीक्षक आणि जिल्हा परिषदेच्या मुख्य कार्यकारी अधिकाऱ्यांना आवश्यक त्या सूचना दिल्या आहेत. शासन त्यांच्या पाठीशी ठामपणे उभे आहे.”
