स्विगी इन्स्टामार्टला एफएसएसएआयचा दणका: कालबा व खराब अन्नपदार्थांच्या तक्रारींवरून बजावल्या ९ नोटिसा
नवी दिल्ली : ऑनलाईन किराणा आणि झटपट वितरण सेवा देणाऱ्या ‘स्विगी इन्स्टामार्ट’वर (Swiggy Instamart) अन्न सुरक्षा आणि मानक प्राधिकरणाने (FSSAI) मोठी कारवाई केली आहे. ग्राहकांकडून मुदत संपलेले, खराब आणि खाण्यास अयोग्य अन्नपदार्थ वितरित केल्याच्या तक्रारी प्राप्त झाल्यानंतर, प्राधिकरणाने कंपनीला तब्बल ९ नोटिसा बजावल्या आहेत. या प्रकरणी सविस्तर खुलासा करण्याचे आणि नियमांचे पालन केल्याचा अहवाल सादर करण्याचे निर्देश देण्यात आले आहेत.
नेमक्या तक्रारी काय आहेत?
ग्राहकांनी केलेल्या तक्रारींनुसार, स्विगी इन्स्टामार्टवरून मागवलेली अनेक उत्पादने निकृष्ट दर्जाची असल्याचे समोर आले आहे. यामध्ये ‘हेल्थिफाय १००% व्हे प्रोटीन’ आणि शेंगदाणे असलेल्या ‘नॉइस होमस्टाईल मद्रास मिक्सचर’ची पाकिटे मुदत संपल्यानंतरही वितरित करण्यात आली होती. तसेच, ‘अक्षयकल्प ऑरगॅनिक’ अंडी कुजलेली आणि दुर्गंधीयुक्त असल्याचे आढळले, तर ‘काक्के दा पराठा’ हा पदार्थही खराब अवस्थेत असल्याचे ग्राहकांनी तक्रारीत नमूद केले आहे.
परवान्याबाबत प्रश्नचिन्ह
केवळ खराब पदार्थांचाच प्रश्न नाही, तर ‘नॉईस’ ब्रँडच्या अंड्यांच्या विक्रीबाबतही एफएसएसएआयने आक्षेप घेतला आहे. स्विगी इन्स्टामार्टच्या विद्यमान परवान्यात या उत्पादनाचा समावेश नसल्याचा संशय व्यक्त करत, प्राधिकरणाने ही विक्री तातडीने थांबवण्याचे निर्देश दिले आहेत. तसेच, आवश्यक असल्यास परवान्यात तातडीने बदल करून घेण्याचेही कंपनीला सांगण्यात आले आहे.
कायदेशीर कारवाईचा इशारा
प्राधिकरणाने स्विगी इन्स्टामार्टला या प्रकरणी सविस्तर खुलासा मागितला आहे. जर कंपनीकडून समाधानकारक उत्तर मिळाले नाही, तर ‘अन्न सुरक्षा आणि मानक कायदा, २००६’ अंतर्गत कठोर कारवाई करण्याचा इशाराही प्राधिकरणाने दिला आहे. झटपट वितरणाच्या नादात ग्राहकांच्या आरोग्याशी तडजोड केली जात असल्याचा ठपका या नोटिसांमधून ठेवण्यात आला आहे.
झटपट सेवेच्या नादात आरोग्याशी तडजोड?
‘क्विक कॉमर्स’ किंवा झटपट डिलिव्हरी देणाऱ्या कंपन्यांच्या सेवेमुळे नागरिकांचे जीवन सुसह्य झाले असले, तरी या सेवेची गुणवत्ता तपासणे हे मोठे आव्हान ठरत आहे. स्विगी इन्स्टामार्टला मिळालेल्या नोटिसा हे दर्शवतात की, वेगासोबतच अन्नाची सुरक्षितता राखणे तितकेच महत्त्वाचे आहे. ग्राहकांच्या आरोग्याशी खेळणाऱ्या अशा कंपन्यांवर सरकार आणि प्राधिकरणाने असाच कडक वचक ठेवणे काळाची गरज आहे. कंपन्यांनी केवळ नफ्याचा विचार न करता, वितरण साखळीत (Supply Chain) असलेल्या अन्नपदार्थांच्या गुणवत्तेकडे बारकाईने लक्ष दिले पाहिजे.
