समृद्धी महामार्गावर अपघातांचे सत्र कायम; सात जणांच्या मृत्यूनंतर पुन्हा १७ जखमी
विशेष प्रतिनिधी | महाराष्ट्र मिशन
अमरावती : हिंदुहृदयसम्राट बाळासाहेब ठाकरे महाराष्ट्र समृद्धी महामार्गावरील जीवघेण्या अपघातांचे सत्र थांबण्याचे नाव घेत नसल्याचे सलग दोन दिवसांतील भीषण घटनांनी पुन्हा एकदा उघड केले आहे. धामणगाव रेल्वेजवळ झालेल्या अपघातात सात तरुणांचा बळी गेल्यानंतर, त्याच्या दुसऱ्याच दिवशी तळेगाव दशासर परिसरात पिकअप वाहन उलटून तब्बल १७ मजूर जखमी झाल्याची घटना घडली आहे. या दुर्दैवी मजुरांपैकी नऊ जण गंभीर जखमी असल्याची माहिती समोर आली आहे.
मिळालेल्या माहितीनुसार, दुर्गामूर्ती विसर्जन वा अन्य धार्मिक कार्यासाठी शेगावहून परतणाऱ्या एका बोलेरो पिकअप वाहनाला २ ऑक्टोबर रोजी मागून भरधाव वेगात येणाऱ्या एका १२ चाकी ट्रकने जोरदार धडक दिली. या भीषण दुर्घटनेत दुर्दैवाने सात तरुणांचा जागीच व उपचारादरम्यान मृत्यू झाला, तर २२ जण गंभीर जखमी झाले.
या दुर्दैवातून सावरत नाही तोच, ४ ऑक्टोबर रोजी तळेगाव दशासर पोलीस ठाण्याच्या हद्दीत आणखी एक अपघात घडला. एका भरधाव पिकअप वाहनाचा अचानक पुढील डाव्या बाजूचा टायर फुटल्याने/निघाल्‍याने चालकाचे वाहनावरील तांत्रिय नियंत्रण सुटले आणि वाहन थेट उलटले. या अपघातात गाडीतील १७ मजूर गंभीर जखमी झाले. घटनेची माहिती मिळताच महामार्ग सुरक्षा पोलिसांनी तातडीने घटनास्थळी धाव घेत सर्व जखमींना उपचारासाठी नजीकच्या रुग्णालयात दाखल केले.
साडेतीन वर्षांत ५७२ बळी; आकडेवारी चिंताजनक
समृद्धी महामार्गावरील वाढत्या अपघातांची आणि मृत्युदराची एकूण आकडेवारी अत्यंत चिंताजनक व थरकाप उडवणारी आहे. उपलब्ध पोलीस आणि अधिकृत माहितीनुसार, डिसेंबर २०२२ ते ऑगस्ट २०२६ या कालावधीत या महामार्गावर तब्बल ६३३ भीषण अपघात झाले असून, यात ५७२ निष्पाप लोकांना आपला जीव गमवावा लागला आहे. विशेष म्हणजे, चालू वर्षाच्या (२०२६) पहिल्या आठ महिन्यांतच १४२ अपघातांत १२८ जणांना आपला प्राण गमवावा लागल्याचे समोर आले आहे.
अतिवेग, चालकांचा थकवा आणि डोळा लागणे, लेन बदलताना नियमांचे होणारे उल्लंघन आणि रात्रीच्या वेळी वाहन चालवताना सतर्कतेचा अभाव ही या अपघातामागील प्रमुख कारणे असल्याचे विविध रस्ते सुरक्षा अभ्यासांतून स्पष्ट झाले आहे. सलग घडणाऱ्या या जीवघेण्या दुर्घटनांच्या पार्श्वभूमीवर आता प्रशासनाने समृद्धी महामार्गावरील गस्ती वाढवून सुरक्षा उपाययोजनांकडे अधिक गांभीर्याने पाहण्याची तीव्र गरज निर्माण झाली आहे.
