सुलतानपूर : चंदीगडहून उत्तर प्रदेशातील देवरिया येथे शहीद सुभेदार मेजर सत्यवान सिंह यांचे पार्थिव घेऊन जाणाऱ्या रुग्णवाहिकेला रविवारी सकाळी पूर्वांचल द्रुतगती मार्गावर भीषण अपघात झाला. हलियापूर पोलीस ठाण्याच्या हद्दीत ७९.६ किलोमीटरजवळ रुग्णवाहिकेची रस्त्याच्या कडेला उभ्या असलेल्या वाहनाला धडक झाली. या दुर्घटनेत सत्यवान सिंह यांचा मुलगा, भाऊ, पुतण्या आणि रुग्णवाहिका चालक अशा चौघांचा मृत्यू झाला.
मृतांमध्ये गौरव सिंह, जसपाल, राजन चौधरी आणि रामसमुझ सिंह यांचा समावेश आहे. गौरव सिंह आणि रुग्णवाहिका चालक जसपाल यांचा जागीच मृत्यू झाला, तर गंभीर जखमी राजन चौधरी आणि रामसमुझ सिंह यांनी रुग्णालयात उपचारादरम्यान अखेरचा श्वास घेतला.
सुभेदार मेजर सत्यवान सिंह हे देवरिया जिल्ह्यातील रहिवासी होते. चंदीगड येथील रुग्णालयात उपचारादरम्यान त्यांचे निधन झाले होते. त्यानंतर कुटुंबीय त्यांचे पार्थिव मूळ गावी घेऊन जात होते. अपघातानंतर सत्यवान सिंह यांचे पार्थिव हलियापूर पोलीस ठाण्याच्या आवारात सन्मानाने ठेवण्यात आले.
अपघाताची माहिती मिळताच पोलीस आणि वरिष्ठ अधिकारी घटनास्थळी दाखल झाले. चौघांचे मृतदेह ताब्यात घेऊन शवविच्छेदनासाठी पाठवण्यात आले असून, कुटुंबीयांना घटनेची माहिती देण्यात आली आहे. जिल्हाधिकारी इंद्रजीत सिंह आणि पोलीस अधीक्षक विनीत जैस्वाल यांनी घटनास्थळी भेट देऊन पाहणी केली.
दरम्यान, सुरुवातीच्या तपासात रुग्णवाहिका नियंत्रणाबाहेर जाऊन उभ्या असलेल्या वाहनाला धडकली असावी, असा पोलिसांचा प्राथमिक अंदाज आहे. अपघात नेमका कसा घडला आणि त्याला कारणीभूत ठरलेली परिस्थिती काय होती, याचा तपास सुरू आहे.
या दुर्घटनेने सत्यवान सिंह यांच्या निधनाचे दुःख अधिकच गडद केले असून, शहीद जवानाच्या पार्थिवासोबत घरी परतणाऱ्या कुटुंबावरच काळाने घाला घातल्याने देवरियातील त्यांच्या मूळ गावी शोककळा पसरली आहे.
