विशेष प्रतिनिधी | महाराष्ट्र मिशन
मुंबई : महाराष्ट्र विधान परिषदेच्या पदवीधर आणि शिक्षक मतदारसंघांच्या आगामी निवडणुकीसाठी भारतीय जनता पक्षाने रविवारी तीन उमेदवारांची घोषणा केली. पुणे पदवीधर मतदारसंघातून डॉ. स्मिता जाधव, नागपूर पदवीधर मतदारसंघातून सुधाकर कोहळे आणि पुणे शिक्षक मतदारसंघातून कौस्तुभ गावडे यांना भाजपने उमेदवारी दिली आहे.
भाजपच्या उमेदवारांच्या घोषणेमुळे महायुतीतील जागावाटपाचे चित्रही स्पष्ट झाले आहे. भाजप पुणे पदवीधर, पुणे शिक्षक आणि नागपूर शिक्षक या तीन जागांवर लढणार असल्याचे पक्षाकडून सांगण्यात आले आहे. संभाजीनगर पदवीधर मतदारसंघ राष्ट्रवादी काँग्रेसकडे, तर अमरावती शिक्षक मतदारसंघ शिवसेनेकडे राहणार आहे.
पुणे पदवीधर मतदारसंघासाठी डॉ. स्मिता जाधव यांची निवड करण्यात आली आहे. नागपूर पदवीधर मतदारसंघात भाजपने माजी आमदार सुधाकर कोहळे यांना मैदानात उतरवले असून, त्यांच्यासमोर काँग्रेसचे विद्यमान आमदार अभिजित वंजारी यांचे आव्हान आहे. पुणे शिक्षक मतदारसंघात कौस्तुभ गावडे यांना उमेदवारी देण्यात आली असून काँग्रेसने विद्यमान आमदार जयंत आसगावकर यांना पुन्हा संधी दिली आहे.
२३ ऑक्टोबरला मतदान
विधान परिषदेच्या पाच जागांसाठी २३ ऑक्टोबरला मतदान होणार असून २७ ऑक्टोबरला मतमोजणी होणार आहे. उमेदवारी अर्ज दाखल करण्याची अंतिम तारीख ६ ऑक्टोबर, अर्जांची छाननी ७ ऑक्टोबर आणि अर्ज मागे घेण्याची अंतिम मुदत ९ ऑक्टोबर आहे. निवडणूक प्रक्रिया ३१ ऑक्टोबरपर्यंत पूर्ण होणार आहे.
या निवडणुकीत पुणे, नागपूर आणि संभाजीनगर पदवीधर तसेच पुणे आणि अमरावती शिक्षक मतदारसंघांचा समावेश आहे. विद्यमान सदस्यांचा कार्यकाळ ६ डिसेंबर २०२६ रोजी संपत असल्याने या पाच जागांसाठी निवडणूक होत आहे. भाजपच्या उमेदवारांच्या घोषणेनंतर आता विरोधकांकडून उर्वरित जागांसाठी कोणाला मैदानात उतरवले जाते आणि निवडणुकीतील लढत कोणत्या दिशेने जाते, याकडे लक्ष लागले आहे.
