मुंबई : पंजाब नॅशनल बँकेला सुमारे ९३.४४ कोटी रुपयांचे कथित नुकसान झाल्याप्रकरणी मुंबईस्थित हंजर बायोटेक एनर्जीज प्रायव्हेट लिमिटेड, कंपनीचे संचालक आणि हमीदारांविरोधात केंद्रीय अन्वेषण विभागाने (सीबीआय) गुन्हा दाखल केला आहे. पीएनबीच्या मुंबईतील स्ट्रेस्ड ॲसेट्स मॅनेजमेंट शाखेने केलेल्या तक्रारीनंतर ३० सप्टेंबर रोजी हा गुन्हा नोंदवण्यात आला.
सीबीआयच्या माहितीनुसार, संबंधित कंपनीने १३५ कोटी रुपयांचे मुदत कर्ज घेतले होते. संबंधित पक्षाच्या चलनांच्या आधारे मिळवलेल्या या कर्जातील काही रक्कम मंजूर उद्देशांऐवजी अन्यत्र वळवण्यात आल्याचा बँकेचा आरोप आहे. या कथित व्यवहारांमुळे बँकेला ९३.४४ कोटी रुपयांचा तोटा झाल्याचे तक्रारीत नमूद करण्यात आले आहे.
या प्रकरणाच्या तपासाचा भाग म्हणून सीबीआयने कंपनीच्या संचालकांशी संबंधित मुंबईतील विविध ठिकाणांवर झडती घेतली. या कारवाईत बँक व्यवहारांशी संबंधित कागदपत्रे आणि मालमत्तेची कागदपत्रे ताब्यात घेण्यात आल्याची माहिती सीबीआयने दिली आहे.
या प्रकरणात कथित कटात सहभागी असलेल्या व्यक्तींची भूमिका, कर्जाची रक्कम नेमकी कुठे वळवण्यात आली आणि तिचा अंतिम वापर कसा झाला, याचा तपास सीबीआय करत आहे. गुन्ह्यात कंपनीचे संचालक, हमीदार तसेच काही अज्ञात सरकारी अधिकारी आणि खासगी व्यक्तींचाही उल्लेख करण्यात आला आहे.
तपासातून पुढे येणाऱ्या आर्थिक व्यवहारांच्या आधारे या प्रकरणातील कथित गैरव्यवहाराची व्याप्ती आणि संबंधितांची भूमिका स्पष्ट होणार आहे.
