‘रेक्टिन प्लस’ औषधातील त्रुटी अन् नियमबाह्य दावे भोवले; पुण्यातील सिप्लाच्या गोदामाचे परवाने रद्द!
पुणे : पुण्यातील वडकी येथील नामवंत ‘सिप्ला फार्मा अँड लाइफ सायन्सेस’ कंपनीच्या वाहतूक व वितरण (डिस्रिब्युशन) गोदामावर अन्न व औषध प्रशासनाने अत्यंत दंडात्मक आणि धडक कारवाई केली आहे. या गोदामाचे औषध विक्री आणि वितरणाचे परवाने एफडीएने अधिकृतपणे रद्द केले आहेत. ‘रेक्टिन प्लस’ या औषधाच्या पॅकेजिंगवर नियमबाह्य दावे आणि चित्रांचा अयोग्य वापर करण्यात आल्याचे उघडकीस आले असून, याशिवाय औषधांची साठवणूक, कागदपत्रे, साठा नोंद आणि मुदतबाह्य औषधांच्या व्यवस्थापनात गंभीर त्रुटी आढळल्यामुळे ही कारवाई करण्यात आली आहे.
तपासणीदरम्यान, ‘रेक्टिन प्लस’ हे अनुसूची ‘एच’ मधील संवेदनशील औषध असूनही त्याच्या पॅकेजिंगवर कायद्याचे उल्लंघन करून नियमबाह्य दावे आणि चित्रे छापल्याचे एफडीएच्या निदर्शनास आले. केवळ पॅकेजिंगच नव्हे, तर गोदामातील औषध साठवणुकीच्या पद्धती अत्यंत निकृष्ट दर्जाच्या असल्याचे तपासणीत स्पष्ट झाले. औषधांचे बॉक्स थेट जमिनीवर ठेवणे, गोदामात प्रचंड धूळ साचलेली असणे आणि मुदतबाह्य झालेली औषधे सुरक्षितपणे साठवण्यासाठी कोणतीही स्वतंत्र व सुरक्षित जागा निश्चित न करणे, अशा अत्यंत गंभीर त्रुटी या कारवाईत समोर आल्या आहेत.
एफडीएने दिलेल्या माहितीनुसार, संबंधित गोदामात औषधांच्या तपासणीची कोणतीही निर्धारित नोंदवही उपलब्ध नव्हती. खरेदी-विक्रीच्या कागदपत्रांमध्ये मोठी तफावत आढळली असून, संगणकावरील डिजिटल नोंदी आणि प्रत्यक्ष गोदामात असलेला प्रत्यक्ष औषधसाठा यातही तफावत असल्याचे स्पष्ट झाले. तसेच, मुदतबाह्य झालेली औषधे नष्ट करण्यासाठी किंवा त्यांची योग्य विल्हेवाट लावण्यासाठी कोणतीही कायदेशीर कार्यपद्धती व नोंदी या ठिकाणी राखल्या जात नव्हत्या.
याआधी गेल्या २७ ऑगस्ट रोजी एफडीएने हे परवाने रद्द करण्याची कारवाई केली होती; मात्र मुंबई उच्च न्यायालयाच्या निर्देशानंतर ती कारवाई तात्पुरती मागे घेण्यात आली होती. त्यानंतर प्रशासकीय नियमांनुसार एफडीएने ४ सप्टेंबर रोजी कंपनीला सुधारित कारणे दाखवा नोटीस बजावली. यावर सिप्ला कंपनीने ११ सप्टेंबर रोजी आपले लेखी उत्तर दाखल केले, तर २१ सप्टेंबर रोजी एफडीएच्या अधिकाऱ्यांनी कंपनीची वैयक्तिक सुनावणी घेतली. ही सर्व कायदेशीर प्रक्रिया पूर्ण झाल्यानंतर अखेर १ ऑक्टोबरला परवाने रद्द करण्याचा अंतिम आणि कठोर आदेश जारी करण्यात आला.
सिप्ला कंपनीची भूमिका
एफडीएच्या या धडक कारवाईनंतर सिप्ला कंपनीने तीव्र नाराजी व्यक्त केली आहे. प्रशासनाच्या या आदेशाचा सखोल आढावा घेतला जात असून, पुढील कायदेशीर पर्यायांचा गांभीर्याने विचार केला जात असल्याचे कंपनीने म्हटले आहे. तसेच, रुग्णांना अत्यंत सुरक्षित आणि उच्च दर्जाची औषधे उपलब्ध करून देण्याच्या आमच्या मूळ बांधिलकीवर कंपनी ठाम असल्याचेही स्पष्ट करण्यात आले आहे.
परंतु, औषध पुरवठा आणि साठवणुकीसारख्या अत्यंत संवेदनशील बाबींमध्ये होत असलेल्या या गंभीर दुर्लक्षामुळे सर्वसामान्यांच्या आरोग्याशी खेळणाऱ्या अशा मोठ्या कंपन्यांवर प्रशासनाने घेतलेली ही आक्रमक भूमिका अत्यंत महत्त्वाची मानली जात आहे.
