आज बैल, उद्या नांगर! कर्जबाजारी देवरावांची बैलावर बसून राजुरा तहसिलदार कचेरीत दणक्यात एन्ट्री

राजुरा (चंद्रपूर) : “पाऊस गेला लांब, पिकलं नाही दाणा… आता तरी मायबाप सरकार आमचं कर्ज फेका ना!” अशीच काहीशी आर्त हाक देत चंद्रपूरच्या राजुरा तालुक्यातील गोयगावचे शेतकरी देवराव पाहाणपटे मंगळवारी (२३ जून) चक्क आपल्या बैलावर टांग मारून थेट तहसील कचेरीत धडकले. “कर्जमाफी झालीच पाहिजे!” अशी घोषणाबाजी करत त्यांनी कचेरीचा परिसर दणाणून सोडला. त्यांच्या या अजब आणि गावरान स्टाईल आंदोलनाने साहेबलोकांसह सामान्य जनतेचेही डोळे विस्फारले.

पावसाने दगा दिला, कर्जाचा डोंगर वाढला!

राजुरा तालुक्यासह परिसरात यंदा पावसाने पुरती दांडी मारली आहे. धरणीमाता करपून चालली आहे आणि पेरलेलं बियाणं मातीतच सडण्याची वेळ आली आहे. एकीकडे खतं, बियाण्यांचा खर्च गगनाला भिडलाय, तर दुसरीकडे हातात दमडीही येईना. अशातच बँकेचे आणि सावकाराचे कर्ज कसे फेडायचे, या विवंचनेत शेतकरी राजा पुरता कोलमडला आहे. शेतकरी टोकाचे पाऊल उचलत असताना सरकार ढिम्म हलत नसल्याने देवरावांनी हे अनोखे पाऊल उचलले.

आज बैल आला, उद्या नांगर येईल!

सकाळी ठीक ११ च्या सुमारास देवराव पाहाणपटे बैलावर स्वार होऊन तहसील कार्यालयात आले, तेव्हा बघणाऱ्यांची एकच गर्दी झाली. “आम्ही रात्रंदिवस बैलाच्या जीवावर माती उकरतो, म्हणून सरकारला जाग आणायला आज बैलालाच सोबत आणलं,” असे देवराव यांनी छातीवर हात ठेवून सांगितले. त्यांच्या या आंदोलनानंतर तिथे उपस्थित असलेल्या लोकांमध्ये एकच चर्चा सुरू झाली की—”आज शेतकरी बैल घेऊन आलाय, सरकारने ऐकलं नाही तर उद्या थेट नांगर घेऊन कचेरी उकरायला येईल!”

महामार्गाने दिली जखम

केवळ पाऊसच नाही, तर परिसरात सुरू असलेल्या महामार्गाच्या कामाने शेतकऱ्यांची पुरती वाट लावली आहे. रस्ता रुंदीकरणामुळे शेकडो शेतकऱ्यांच्या जमिनी बाधित झाल्या आहेत. पाण्याचा निचरा होत नाही, शेतात जायला रस्ते उरले नाहीत. “एक तर निसर्ग कोपला आणि वरून हे रस्त्याचे काम नडलं,” अशी व्यथा पाहाणपटे यांनी मांडली.

प्रशासन ढिम्म, पण शेतकरी संघटना आक्रमक

देवरावांचा हा अवतार पाहून तहसील कार्यालयातील अधिकाऱ्यांची चांगलीच धांदल उडाली. अखेर प्रशासनाने शेतकऱ्याचे म्हणणे ऐकून घेतले आणि त्यांचे निवेदन पुढील कार्यवाहीसाठी शासनाकडे पाठवण्याचे आश्वासन दिले. या आंदोलनामुळे राजुऱ्यातील शेतकरी संघटना कमालीच्या आक्रमक झाल्या असून, सरकारने लवकरात लवकर निर्णय घेतला नाही तर आंदोलन अधिक तीव्र करण्याचा इशारा दिला आहे.

🔴शेतकऱ्याच्या प्रमुख मागण्या🔴

◾सरसकट आणि संपूर्ण कर्जमाफी तात्काळ जाहीर करा.

◾शेतीमालाला हमीभाव देऊन वाढत्या उत्पादन खर्चावर नियंत्रण आणा.

◾महामार्ग प्रकल्पामुळे बाधित शेतकऱ्यांचे प्रश्न तातडीने सोडवा.