सावर्डेतून बेपत्ता १३ वर्षीय मुलगी मुंबईत सापडली; युवक पोलिसांच्या ताब्यात

चिपळूण : रत्नागिरी जिल्ह्यातील चिपळूण तालुक्यातील सावर्डे येथून ९ नोव्हेंबर रोजी बेपत्ता झालेल्या १३ वर्षीय मुलीचा शोध घेण्यात पोलिसांना यश आले आहे. रत्नागिरी पोलिसांच्या स्थानिक गुन्हे अन्वेषण शाखेने शोधमोहीम राबवून मुलीला मुंबईत शोधून काढले. तिच्यासोबत असलेल्या युवकाला पोलिसांनी ताब्यात घेतले आहे.

मुलगी बेपत्ता झाल्यानंतर सावर्डे परिसरात चिंतेचे आणि तणावाचे वातावरण निर्माण झाले होते. मुलीला फूस लावून पळवून नेल्याचा आरोप तिच्या नातेवाइकांनी केला होता. या प्रकरणाचे गांभीर्य लक्षात घेऊन पोलिसांनी शोधमोहीम सुरू केली. चिपळूण, रत्नागिरी आणि सावर्डे पोलिसांनी संयुक्तरीत्या तपास केला. मुलीचा शोध घेण्यासाठी विशेष पथकही कार्यरत करण्यात आले होते.

अखेर मुंबईत मुलगी आणि तिच्यासोबत असलेला युवक आढळून आला. पोलिसांनी मुलीला महिला पोलिसांच्या ताब्यात दिले असून युवकाला पुढील कायदेशीर कारवाईसाठी ताब्यात घेतले आहे. या प्रकरणी गुन्हा दाखल करण्यात आल्याची माहिती पोलिसांनी दिली आहे.

मुलगी सापडल्याने तिच्या कुटुंबीयांना दिलासा मिळाला आहे. युवकाची भूमिका, मुलगी मुंबईत कशी पोहोचली आणि या प्रकरणातील पुढील कायदेशीर कारवाई याबाबत पोलिसांचा तपास सुरू आहे.