पोलीस आयुक्तांचे आदेश की केवळ बैठकीपुरते? पर्वतीतील कथित जुगार अड्ड्यांचा प्रश्न ऐरणीवर

पुणे : शहरातील अवैध धंद्यांविरोधात पोलीस आयुक्त अमितेश कुमार वारंवार कठोर कारवाईचे निर्देश देत असल्याचे सांगितले जात असतानाही पर्वती पोलीस ठाण्याच्या हद्दीत पत्त्यांचे कथित जुगार अड्डे सुरू असल्याच्या तक्रारी स्थानिक नागरिकांकडून केल्या जात आहेत. दांडेकर पूल परिसरातील स्पंदन फॅमिली केअर क्लिनिक असलेल्या इमारतीतील पार्किंगमधील एका खोलीत पत्त्यांचा कथित जुगार अड्डा सुरू असल्याचे सांगितले जात आहे.

विशेष चिंतेची बाब म्हणजे, याच सोसायटीच्या मागील बाजूला असलेल्या सार्वजनिक स्वच्छतागृहाच्या वरच्या भागातही कथित जुगार अड्डा सुरू असल्याचे सांगितले जात आहे. या सार्वजनिक सुविधेचा वापर महिला आणि परिसरातील नागरिकांकडून केला जातो. अशा ठिकाणी रात्रीच्या वेळी अनोळखी व्यक्तींची वर्दळ आणि जुगार अड्डा सुरू असल्याचे सांगितले जात असेल, तर महिलांच्या सुरक्षिततेचा प्रश्न गंभीर बनतो. सार्वजनिक स्वच्छतागृहात येणाऱ्या महिलांना सुरक्षित वातावरण मिळणार कसे, असा सवाल स्थानिकांकडून उपस्थित केला जात आहे. सार्वजनिक सुविधांच्या परिसरातच असे प्रकार सुरू असल्याच्या तक्रारी समोर येत असतील, तर संबंधित यंत्रणांची जबाबदारी निश्चित होणे आवश्यक आहे.

स्थानिकांच्या म्हणण्यानुसार, हे कथित अड्डे रात्री उशिरापर्यंत सुरू राहत असल्याने जुगार खेळणाऱ्यांसह अनोळखी व्यक्तींची वर्दळ वाढते. त्यामुळे परिसरातील रहिवाशांना त्रास सहन करावा लागत आहे. जुगाराच्या ठिकाणी वादविवाद किंवा अन्य अनुचित प्रकार घडण्याची शक्यता लक्षात घेता हा प्रश्न केवळ अवैध जुगारापुरता मर्यादित राहत नाही, तर परिसरातील कायदा-सुव्यवस्था आणि नागरिकांच्या सुरक्षिततेशीही जोडला जातो.

पोलीस आयुक्तांच्या निर्देशांचे काय झाले?

पोलीस आयुक्त अमितेश कुमार यांनी गुन्हे आढावा बैठकांमध्ये अवैध धंद्यांविरोधात कारवाई करण्याचे निर्देश दिल्याचे सांगितले जाते. असे असताना पर्वती पोलीस ठाण्याच्या हद्दीत कथित जुगार अड्डे सुरू असल्याच्या तक्रारी समोर येत असतील, तर स्थानिक पोलिसांची गस्त नेमकी कुठे आहे? या ठिकाणांची माहिती पोलिसांना नाही का? नागरिकांच्या तक्रारींची दखल घेतली जाते का? की या प्रकारांकडे जाणीवपूर्वक दुर्लक्ष केले जात आहे? असे प्रश्न उपस्थित होत आहेत.

गुन्हे शाखेच्या विशेष पथकाकडून कारवाईची मागणी

दांडेकर पूल परिसरातील संबंधित सोसायटीचे पार्किंग, सार्वजनिक स्वच्छतागृहाच्या वरचा भाग आणि अन्य तक्रारग्रस्त ठिकाणांची गोपनीयरीत्या माहिती संकलित करून गुन्हे शाखेच्या विशेष पथकाने या कथित जुगार अड्ड्यांवर कारवाई करावी, अशी मागणी नागरिकांकडून होत आहे. संबंधित ठिकाणांची खातरजमा करून जुगाराचे अड्डे चालविणाऱ्यांविरोधात कायदेशीर कारवाई करावी. तसेच, या प्रकारांकडे स्थानिक पोलिसांकडून दुर्लक्ष होत असल्याचे आढळल्यास संबंधितांची जबाबदारीही निश्चित करावी, अशी अपेक्षा व्यक्त होत आहे.

शहरातील अवैध धंदे रोखणे आणि नागरिकांना सुरक्षित वातावरण उपलब्ध करून देणे ही पोलिसांची जबाबदारी आहे. विशेषतः सार्वजनिक स्वच्छतागृहासारख्या सुविधांच्या परिसरात महिलांच्या सुरक्षिततेशी तडजोड होता कामा नये. त्यामुळे पर्वती पोलिसांच्या हद्दीतील या कथित जुगार अड्ड्यांच्या तक्रारींची पोलीस आयुक्त अमितेश कुमार दखल घेणार का आणि गुन्हे शाखेच्या विशेष पथकाकडून कधी कारवाई होणार, याकडे नागरिकांचे लक्ष लागले आहे.