पुणे विधान परिषद निवडणूक: महायुतीत अंतर्गत पेच; अजित पवार गटात दोन अर्ज, भाजपमध्ये बंडखोरीने खळबळ
पुणे : पुणे स्थानिक स्वराज्य संस्था विधान परिषद निवडणुकीच्या उमेदवारी अर्ज दाखल करण्याच्या शेवटच्या टप्प्यात अत्यंत नाट्यमय घडामोडी घडल्या आहेत. महायुतीमध्ये जागावाटप आणि उमेदवारीवरून अंतर्गत धुसफूस चव्हाट्यावर आली असून, अजित पवार गटातील गोंधळ आणि भाजपमधील बंडखोरीमुळे पुण्याचे राजकीय वातावरण कमालीचे तापले आहे.
अजित पवार गटात ‘एका जागेसाठी दोन उमेदवार’
राष्ट्रवादी काँग्रेस (अजित पवार) पक्षाकडून अधिकृत उमेदवार कोण? याबाबतचा सस्पेन्स वाढला आहे. पक्षाचे खंदे नेते विक्रम काकडे आणि आमदार सुनील टिंगरे या दोघांनीही आपले उमेदवारी अर्ज दाखल केल्याने पक्षांतर्गत मोठा पेच निर्माण झाला आहे. ऐनवेळी दोघांनीही अर्ज भरल्यामुळे कार्यकर्त्यांमध्ये संभ्रमाचे वातावरण आहे. पक्षाचे सर्वोच्च नेते अजित पवार अखेर कोणाच्या नावावर शिक्कामोर्तब करणार आणि कोणाला माघार घ्यायला लावणार, याकडे सर्वांचे लक्ष लागले आहे.
भाजप जिल्हाध्यक्ष प्रदीप कंद यांचे बंड
दुसऱ्या बाजूला भाजपलाही पुण्यात मोठ्या बंडखोरीचा सामना करावा लागत आहे. भाजपचे पुणे जिल्हाध्यक्ष प्रदीप कंद यांनी महायुतीच्या अधिकृत धोरणाविरोधात जात थेट बंडखोरी केली असून आपला उमेदवारी अर्ज दाखल केला आहे. जिल्हाध्यक्षांनीच बंडाचे निशाण फडकावल्यामुळे भाजपच्या गोटात मोठी खळबळ उडाली असून, यामुळे महायुतीच्या मतांची फाटाफूट होण्याची शक्यता वर्तवली जात आहे.
४ जूनच्या ‘डेडलाईन’कडे सर्वांचे लक्ष
या सर्व राजकीय गोंधळाचा फैसला आता ४ जून रोजी होणार आहे. ४ जून हा उमेदवारी अर्ज मागे घेण्याचा शेवटचा दिवस आहे. या मुदतीपूर्वी अजित पवार विक्रम काकडे आणि सुनील टिंगरे यांच्यातील वाद कसा मिटवतात आणि भाजपचे वरिष्ठ नेते प्रदीप कंद यांचे बंड थंड करण्यात यशस्वी होतात का? यावरच या निवडणुकीचे पुढील चित्र स्पष्ट होणार आहे. महायुतीतील या अंतर्गत बंडाळीमुळे विरोधकांच्या आशा मात्र पल्लवित झाल्या आहेत.
