लोकसभेतील २७३ जागा आता महिलांसाठी राखीव

नवी दिल्ली : महिला आरक्षणानंतर उत्तर प्रदेश मध्ये सर्वाधिक ४० लोकसभा जागा वाढतील. या जागा ८० वरून १२० होतील. महाराष्ट्रामध्ये महिलांसाठी २४ जागा आरक्षित होतील. येथे लोकसभेच्या जागा ४८ वरून ७२ होतील. बिहारमध्ये महिला जागांची संख्या २० होऊ शकते. येथे एकूण जागा ४० वरून ६० पर्यंत पोहोचू शकतात.

मध्य प्रदेशात १५ महिला आरक्षित जागा वाढू शकतात. तामिळनाडूमध्ये २० आणि दिल्लीमध्ये ४ महिला जागा असतील. झारखंडमध्ये ७ महिला आरक्षित जागा वाढण्याचा अंदाज आहे.

पंतप्रधान नरेंद्र मोदी यांच्या अध्यक्षतेखाली बुधवारी झालेल्या मंत्रिमंडळाच्या बैठकीत नारी शक्ती वंदन कायद्यात सुधारणा करणाऱ्या विधेयकाच्या मसुद्याला मंजुरी देण्यात आली. सरकारने अर्थसंकल्पीय अधिवेशन वाढवून १६ ते १८ एप्रिलपर्यंत संसदेचे विशेष अधिवेशन बोलावले आहे, ज्यात हे सुधारणा विधेयक मंजूर होण्याची शक्यता आहे. संसदेची मंजुरी मिळाल्यानंतर हा कायदा ३१ मार्च २०२९ पासून लागू होईल.

या प्रस्तावानुसार लोकसभेच्या जागा सध्याच्या ५४३ वरून वाढवून ८१६ केल्या जातील, ज्यापैकी २७३ जागा महिलांसाठी आरक्षित असतील. लोकसभा निवडणुका आणि काही राज्यांच्या विधानसभा निवडणुकांमध्ये ते आरक्षण लागू होईल. अनुसूचित जाती आणि जमातींच्या आरक्षित जागांमध्येही महिलांसाठी वाटा निश्चित केला जाईल.

सरकार एका घटनादुरुस्ती विधेयकासोबतच पुनर्रचना कायद्यात सुधारणा करण्यासाठी स्वतंत्र सामान्य विधेयकही आणेल, जेणेकरून नव्याने जागा निश्चित केल्या जाऊ शकतील. नवीन जागांची निश्चिती २०२७ च्या जनगणनेऐवजी २०११ च्या जनगणनेच्या आधारावर केली जाऊ शकते. हा कायदा राज्यांच्या विधानसभांना आणि दिल्ली, जम्मू-काश्मीर, पुद्दुचेरी यांसारख्या केंद्रशासित प्रदेशांनाही लागू केला जाईल.