सोनं-चांदी सामान्यांच्या आवाक्याबाहेर! आयात शुल्कात ६ टक्क्यांवरून १५ टक्क्यांपर्यंत मोठी वाढ

नवी दिल्ली : देशांतर्गत बाजारपेठेत सोन्या-चांदीच्या वाढत्या मागणीवर नियंत्रण मिळवण्यासाठी आणि परकीय चलन साठ्याचे रक्षण करण्यासाठी केंद्र सरकारने मोठा निर्णय घेतला आहे. सोन्या-चांदीवरील मूलभूत आयात शुल्कात (Customs Duty) ६ टक्क्यांवरून थेट १५ टक्क्यांपर्यंत वाढ करण्यात आली आहे.

प्लॅटिनम आणि नाणीही महागणार

केवळ सोन्या-चांदीवरच नाही, तर प्लॅटिनमवरील आयात शुल्कातही वाढ करून ते आता १५.४ टक्के करण्यात आले आहे. याव्यतिरिक्त, सोन्याची नाणी, सोन्याचे डोअर (Gold Dore) आणि इतर मौल्यवान धातूंच्या घटकांवरही वाढीव शुल्क लागू होणार आहे. यामुळे आगामी काळात सोन्या-चांदीच्या दागिन्यांच्या किमतीत मोठी वाढ होण्याची शक्यता वर्तवण्यात येत आहे.

सरकारने हा निर्णय का घेतला?

व्यापारी तूट कमी करणे: भारताकडून होणाऱ्या सोन्याच्या मोठ्या आयातीमुळे देशाची व्यापारी तूट (Trade Deficit) वाढत आहे, ती नियंत्रित करण्यासाठी हे पाऊल उचलले आहे.

रुपयाला सावरणे: डॉलरच्या तुलनेत रुपयाचे मूल्य स्थिर ठेवण्यासाठी अनावश्यक आयातीवर निर्बंध घालणे आवश्यक होते. पंतप्रधान नरेंद्र मोदी यांनी नुकतेच नागरिकांना सोन्याची खरेदी काही काळासाठी टाळण्याचे आवाहन केले होते, त्याच पार्श्वभूमीवर हा धोरणात्मक निर्णय घेण्यात आला आहे.

ग्राहकांवर काय परिणाम होईल?

या निर्णयामुळे प्रति १० ग्रॅम सोन्याच्या किमतीत हजारो रुपयांची वाढ होऊ शकते. लग्नसराईच्या काळात दागिन्यांची खरेदी करणाऱ्या सर्वसामान्यांच्या खिशाला आता चांगलीच कात्री लागणार आहे. तसेच, चांदीच्या वस्तू आणि भांड्यांच्या किमतीतही लक्षणीय वाढ होणार आहे.

सराफा बाजारातील तज्ज्ञांच्या मते, आयात शुल्क वाढल्यामुळे बाजारात सोन्याची अनधिकृत आवक (तस्करी) वाढण्याची भीतीही व्यक्त केली जात आहे. मात्र, सरकारी तिजोरीतील परकीय चलन वाचवण्यासाठी सरकारने हा कठोर निर्णय घेतल्याचे दिसत आहे.