मुंबईत रेल्वेची मोठी कारवाई! हायकोर्टाच्या आदेशानंतर वांद्रे स्थानक परिसरातील ५०० अवैध बांधकामे जमीनदोस्त
मुंबई : मुंबईतील सर्वात गजबजलेल्या रेल्वे स्थानकांपैकी एक असलेल्या वांद्रे (Bandra) स्थानक परिसरात आज पश्चिम रेल्वेने (Western Railway) अतिक्रमणांविरोधात एक मोठी आणि धडक कारवाई सुरू केली आहे. मुंबई उच्च न्यायालयाच्या (Mumbai High Court) आदेशानंतर वांद्रे स्थानक आणि आसपासच्या रेल्वेच्या जमिनीवर वर्षानुवर्षे ठाण मांडून बसलेली सुमारे ५०० अवैध बांधकामे जमीनदोस्त करण्यास सुरुवात झाली आहे.
न्यायालयाच्या आदेशानंतर पाऊल
पश्चिम रेल्वेच्या जमिनीवर दीर्घकाळापासून मोठ्या प्रमाणावर अतिक्रमण झाले होते. यामुळे रेल्वेच्या विकासकामांमध्ये अडथळे येत होते, तसेच प्रवाशांच्या सुरक्षेचा आणि सुविधेचा प्रश्नही निर्माण झाला होता. यासंदर्भातील कायदेशीर प्रक्रियेनंतर मुंबई उच्च न्यायालयाने हे अतिक्रमण हटवण्याचे स्पष्ट निर्देश दिले होते. न्यायालयाच्या याच आदेशाचा मान ठेवून आणि रीतसर कायदेशीर प्रक्रियेचे पालन करून रेल्वे प्रशासनाने आज सकाळीच या मोहिमेला सुरुवात केली.
“ही कारवाई अचानक करण्यात आलेली नाही. संबंधित अतिक्रमणधारकांना आधीच कायदेशीर नोटीस बजावण्यात आल्या होत्या आणि रीतसर प्रक्रिया पूर्ण केल्यानंतरच आज प्रत्यक्ष कारवाईला सुरुवात करण्यात आली आहे,” अशी माहिती रेल्वेच्या वरिष्ठ अधिकाऱ्यांनी दिली.
कडक पोलीस बंदोबस्तात कारवाई
कारवाईदरम्यान कोणताही कायदा व सुव्यवस्थेचा प्रश्न निर्माण होऊ नये म्हणून घटनास्थळी पश्चिम रेल्वेचे सुरक्षा बल (RPF), रेल्वे पोलीस (GRP) आणि स्थानिक मुंबई पोलिसांचा मोठा फौजफाटा तैनात करण्यात आला आहे. आधुनिक यंत्रसामग्री आणि बुलडोझरच्या साहाय्याने ही अनधिकृत बांधकामे पाडण्याचे काम वेगाने सुरू आहे.
प्रवाशांना दिलासा मिळण्याची शक्यता
वांद्रे स्थानक परिसरातील या मोठ्या कारवाईमुळे स्थानकात येण्या-जाण्याचा मार्ग मोकळा होणार असून, दररोज प्रवास करणाऱ्या लाखो प्रवाशांना यामुळे मोठा दिलासा मिळण्याची शक्यता आहे. रेल्वे प्रशासनाच्या या धडक कारवाईमुळे मुंबईतील इतर रेल्वे स्थानक परिसरातील अतिक्रमणधारकांचेही धाबे दणाणले आहेत. रेल्वेच्या जमिनीवरील हे अतिक्रमण पूर्णपणे साफ होईपर्यंत ही मोहीम अशीच सुरू राहणार असल्याचे समजते.
