पश्चिम बंगालमध्ये राजकीय भूकंप! अभिषेक बॅनर्जींनंतर कल्याण बॅनर्जींवरही हल्ला; अटक केलेले आरोपी ‘टीएमसी’ कनेक्शनमुळे वादात!

कोलकाता : पश्चिम बंगालमधील राजकीय वातावरण पुन्हा एकदा कमालीचे तापले आहे. तृणमूल काँग्रेसचे (TMC) राष्ट्रीय सरचिटणीस अभिषेक बॅनर्जी यांच्यावर सोनारपूर येथे झालेल्या हल्ल्याची घटना ताजी असतानाच, आता हुगळी जिल्ह्यातील चंडीतळा येथे पक्षाचे खासदार कल्याण बॅनर्जी यांच्यावरही जमावाकडून हल्ला करण्यात आला आहे. या दोन्ही घटनांमुळे पश्चिम बंगालमध्ये तृणमूल काँग्रेस आणि भाजप समोरासमोर आले असून दोन्ही पक्षांमध्ये जोरदार आरोप-प्रत्यारोप सुरू आहेत.

कल्याण बॅनर्जी यांच्यावर चंडीतळा येथे हल्ला

अभिषेक बॅनर्जी यांच्यावरील हल्ल्याच्या निषेधार्थ आणि अटक केलेल्या टीएमसी कार्यकर्त्यांच्या सुटकेची मागणी करण्यासाठी कल्याण बॅनर्जी चंडीतळा पोलीस ठाण्यात निवेदन देण्यास जात होते. यादरम्यान पोलीस ठाण्याबाहेर जमावाने त्यांना घेरले आणि घोषणाबाजी सुरू केली. कल्याण बॅनर्जी यांनी आरोप केला आहे की, भाजप कार्यकर्त्यांनी त्यांच्यावर हल्ला केला आणि त्यांच्या डोक्याला कडक वस्तू मारण्यात आली, ज्यामुळे ते जखमी झाले. या घटनेनंतर बॅनर्जी यांनी पोलीस ठाण्याबाहेरच धरणे आंदोलन सुरू केले.

अभिषेक बॅनर्जी हल्ला प्रकरणात सहावी अटक अन् ‘ट्विस्ट’

दुसरीकडे, सोनारपूर येथे अभिषेक बॅनर्जी यांच्या दौऱ्यादरम्यान झालेल्या मारहाण आणि दगडफेक प्रकरणी पोलिसांनी कारवाईचा वेग वाढवला आहे. पोलिसांनी आधी ५ जणांना अटक केली होती, त्यानंतर आता या प्रकरणात ६ व्या आरोपीला ताब्यात घेण्यात आले आहे. हे सर्व आरोपी स्थानिक रहिवासी आहेत.

मात्र, या अटकेनंतर प्रकरणाला एक नवीन आणि धक्कादायक वळण मिळाले आहे. भाजप सूत्रांनी आणि भाजप आयटी सेलचे प्रमुख अमित मालवीय यांनी ‘एक्स’ (ट्विटर) वर दावा केला आहे की, अटक करण्यात आलेले सहाही आरोपी अवघ्या महिन्याभरापूर्वीपर्यंत तृणमूल काँग्रेसच्याच माजी आमदार लवली मैत्रा यांचे अत्यंत जवळचे सहकारी होते.

राजकीय वाद पेटला

भाजपच्या या खुलाशामुळे आता राजकीय वर्तुळात नवीन चर्चा सुरू झाली आहे. हा हल्ला भाजप पुरस्कृत आहे की तृणमूल काँग्रेसमधील अंतर्गत वादाचा (Internal Feud) परिणाम आहे? असा सवाल उपस्थित केला जात आहे. दरम्यान, माजी आमदार लवली मैत्रा यांनी हे आरोप फेटाळून लावले असून, अटक करण्यात आलेल्या महिला व पुरुष हे भाजपचे सक्रिय कार्यकर्ते असल्याचा दावा केला आहे.

सध्या सोनारपूर आणि चंडीतळा पोलीस या दोन्ही घटनांचा सखोल तपास करत असून, कायदा व सुव्यवस्था राखण्यासाठी परिसरात मोठा पोलीस बंदोबस्त आणि केंद्रीय सुरक्षा दल तैनात करण्यात आले आहे.