टायगर श्रॉफ गोळीबार प्रकरणात १२वी अटक; सोनीपतच्या अमनला पोलिसांनी पकडले

मुंबई : अभिनेता टायगर श्रॉफ याच्या कारवरील गोळीबार प्रकरणात मुंबई पोलिसांच्या गुन्हे शाखेने आणखी एका आरोपीला हरियाणातील सोनीपत जिल्ह्यातून अटक केली आहे. अमन असे या आरोपीचे नाव असून, त्याच्या बँक खात्यात संशयास्पद आर्थिक व्यवहार झाल्याचे तपासात आढळले आहे. या अटकेमुळे प्रकरणातील अटक आरोपींची संख्या १२ झाली आहे. त्यापैकी नऊ आरोपी सोनीपत जिल्ह्यातील आहेत.

मुंबई गुन्हे शाखेच्या पथकाने हरियाणा पोलिसांच्या मदतीने सोनीपत जिल्ह्यातील रोहणा गावातून अमनला ताब्यात घेतले. यापूर्वी अटक करण्यात आलेल्या कुणाल जामसिंग याच्याशी अमनचे जवळचे संबंध असल्याचे तपासात समोर आले आहे. कुणालकडून अमनच्या बँक खात्यात पैसे जमा झाल्याचे पोलिसांना आढळले. या व्यवहारांचा गोळीबार प्रकरणाशी संबंध आहे का, याचा तपास केला जात आहे.

अमनला हरियाणातील न्यायालयात हजर करून मुंबईत आणण्यासाठी ट्रान्झिट रिमांड मागण्यात येणार आहे. त्यानंतर मुंबईत त्याची चौकशी केली जाणार आहे. आर्थिक व्यवहारांमागील उद्देश, संबंधित व्यक्तींमधील संबंध आणि या प्रकरणातील त्याची नेमकी भूमिका तपासली जाणार आहे.

दरम्यान, १८ ऑक्टोबर रोजी मुंबईतील जुहू परिसरात टायगर श्रॉफच्या कारवर गोळीबार झाला होता. या घटनेनंतर मुंबई पोलिसांनी विविध राज्यांत तपासाची चक्रे फिरवत आतापर्यंत १२ जणांना अटक केली आहे. या प्रकरणात महाराष्ट्र संघटित गुन्हेगारी नियंत्रण कायद्याच्या (मकोका) तरतुदी लागू करण्यात आल्या आहेत. यापूर्वी अटक केलेल्या ११ आरोपींना विशेष मकोका न्यायालयाने ६ नोव्हेंबरपर्यंत पोलीस कोठडी सुनावली आहे.

या प्रकरणातील आर्थिक व्यवहार, डिजिटल पुरावे आणि आरोपींमधील कथित संबंधांची तपासणी मुंबई गुन्हे शाखेकडून सुरू आहे. फरार आरोपी अनिल पंडित याचाही शोध घेतला जात आहे.