मुंब्र्यात दीड कोटींहून अधिक किमतीचे मेफेड्रोन जप्त; चार विदेशी नागरिकांना अटक

ठाणे : अंमली पदार्थांच्या अवैध व्यवसायाविरोधात कारवाई करत मुंब्रा पोलिसांनी चार परदेशी नागरिकांना अटक केली आहे. त्यांच्याकडून दीड कोटी रुपयांहून अधिक किमतीचा मेफेड्रोन जप्त करण्यात आला. अटक केलेल्यांमध्ये टांझानियाचे तीन आणि नायजेरियाच्या एका नागरिकाचा समावेश आहे.

पोलिसांनी कारवाईदरम्यान मेफेड्रोनसह मोबाईल फोन, इलेक्ट्रॉनिक वजनकाटा आणि अन्य साहित्य जप्त केले आहे. या साहित्याचा वापर कथित अमली पदार्थांच्या व्यवहारात होत होता का, याची तपासणी केली जात आहे.

अटक करण्यात आलेल्या चौघांच्या व्हिसा आणि पासपोर्टची वैधता संपल्याचेही तपासात समोर आले आहे. त्यामुळे अमली पदार्थांच्या प्रकरणासोबतच त्यांच्या भारतातील वास्तव्याची वैधता आणि संबंधित कागदपत्रांचीही चौकशी केली जाणार आहे.

या प्रकरणात अमली पदार्थांचा पुरवठा कुठून होत होता, त्याचे वितरण कोणामार्फत केले जात होते आणि या व्यवहारांमध्ये आणखी कोणाचा सहभाग आहे, याचा तपास पोलीस करत आहेत. या कारवाईमुळे मुंब्रा परिसरातील अमली पदार्थांच्या अवैध व्यवहारांचे जाळे पुन्हा चर्चेत आले आहे.