पुणे : गणेशोत्सवाच्या काळात कायदा व सुव्यवस्था राखण्यासाठी पुणे जिल्हाधिकाऱ्यांनी महत्त्वाचा निर्णय घेतला आहे.
गौरी आगमन, २ सप्टेंबर आणि अनंत चतुर्दशी (६ सप्टेंबर) या तीन दिवशी मद्यविक्री पूर्णपणे बंद राहणार आहे. या काळात मद्यविक्री दुकाने आणि आस्थापनांना मिरवणूक संपेपर्यंत बंद ठेवण्याचे आदेश देण्यात आले आहेत. हा निर्णय महाराष्ट्र दारूबंदी कायद्याअंतर्गत जारी करण्यात आला असून, सार्वजनिक शांतता आणि सुरक्षितता सुनिश्चित करण्यासाठी हे पाऊल उचलण्यात आले आहे.
गणेशोत्सवात पुण्यात लाखो भाविक मिरवणुकीत सहभागी होतात. या काळात कोणताही अनुचित प्रकार टाळण्यासाठी आणि उत्सव शांततेत पार पडावा यासाठी जिल्हा प्रशासनाने हा निर्णय घेतला आहे. यापूर्वी गणेशोत्सवाच्या दहा दिवसांसाठी मद्यविक्री बंदीचा आदेश जारी करण्यात आला होता. मात्र, या आदेशाला उच्च न्यायालयाने स्थगिती दिली होती. त्यानंतर सुधारित आदेश जारी करत जिल्हाधिकाऱ्यांनी केवळ तीन महत्त्वाच्या दिवसांसाठी बंदी लागू केली आहे. यामुळे व्यापारी आणि नागरिकांमध्ये संतुलन राखण्याचा प्रयत्न करण्यात आला आहे.
