शाळा पुन्हा ‘किलबिलल्या’: सोमवारापासून राज्यात उत्साहात नवीन शैक्षणिक वर्षाचा शुभारंभ; जिल्हा परिषद शाळा ठरतायत ‘मॉडेल’!
मुंबई : महिनाभराच्या प्रदीर्घ सुटीनंतर सोमवारपासून राज्यातील शाळांचे दरवाजे विद्यार्थ्यांसाठी पुन्हा एकदा खुले झाले आहेत. शाळांच्या पहिल्याच दिवशी विद्यार्थ्यांचा उत्साह ओसंडून वाहत होता. राज्यभरात विविध ठिकाणी मंत्री आणि लोकप्रतिनिधींच्या उपस्थितीत ‘प्रवेशोत्सव’ साजरा करण्यात आला.
जिल्हा परिषद शाळा आता ‘स्मार्ट’
मुख्यमंत्री देवेंद्र फडणवीस यांनी पनवेलमधील वहाळ येथील जिल्हा परिषद शाळेला अचानक भेट देऊन शिक्षकांच्या कामाचे कौतुक केले. “आज जिल्हा परिषदेतील शाळांचे शिक्षण ९० टक्के खाजगी शाळांपेक्षाही सरस झाले आहे,” असे मत मुख्यमंत्र्यांनी व्यक्त केले. पिंपरी चिंचवडमध्ये बोलताना सुनेत्रा पवार यांनीही बदलत्या शिक्षण पद्धतीचे कौतुक करत, अत्याधुनिक लॅब आणि दर्जेदार सुविधामुळे जिल्हा परिषद शाळा ‘मॉडेल’ बनत असल्याचे सांगितले.
विद्यार्थ्यांचे अनोखे स्वागत
राज्याच्या कानाकोपऱ्यात विद्यार्थ्यांचे स्वागत उत्साही वातावरणात पार पडले:
◾बीड: येथे शिक्षकांनी विद्यार्थ्यांचे औक्षण केले आणि तोंड गोड करण्यासाठी त्यांना ‘गुलाब जामुन’ भरवले. मुलांसाठी खास ‘सेल्फी पॉईंट’ही तयार करण्यात आले होते.
◾छत्रपती संभाजीनगर: पालकमंत्री संजय शिरसाट यांनी हजेरी लावत, पालकांना मुलांना हक्काचे शिक्षण देण्याचा सल्ला दिला.
◾इतर जिल्हे: सर्वत्र फुलांचे वाटप, नवीन गणवेशाचे वाटप आणि फुग्यांची सजावट करून शाळांना यात्रेचे स्वरूप आले होते.
विदर्भात शाळा ३० जूनपासून
विदर्भातील तीव्र उष्णतामान, विद्यार्थ्यांचे आरोग्य आणि मुंबई उच्च न्यायालयाच्या नागपूर खंडपीठाचे निर्देश लक्षात घेता, अमरावती जिल्ह्यातील शाळा १५ ऐवजी ३० जूनपासून सुरू करण्याचा निर्णय शिक्षण विभागाने घेतला आहे.
नवीन शैक्षणिक वर्षाच्या पहिल्या दिवशी शाळांमध्ये झालेला हा ‘प्रवेशोत्सव’ शिक्षण क्षेत्रातील सकारात्मक बदलांची साक्ष देत असून, विद्यार्थ्यांच्या भविष्यासाठी एक आश्वासक सुरुवात मानली जात आहे.
